ՄԱԿ-ը կքննարկի Թրամփի ծրագիրը Գազայի վերաբերյալ․ բաժանում երկու մասի, որոնցից միայն մեկը կվերականգնվի

ՄԱԿ-ի Անվտանգության խորհուրդը քվեարկելու է ԱՄՆ նախագահ Դոնալդ Թրամփի Գազայում խաղաղության ծրագրի շուրջ երկուշաբթի՝ նոյեմբերի 17-ին: Ավելի վաղ ԱՄՆ-ն և նրա դաշնակիցները՝ Կատարը, Եգիպտոսը, Միացյալ Արաբական Էմիրությունները, Սաուդյան Արաբիան, Ինդոնեզիան, Պակիստանը, Հորդանանը և Թուրքիան, համատեղ հայտարարությամբ կոչ էին արել ՄԱԿ-ի Անվտանգության խորհրդին արագորեն ընդունել բանաձև, որը կաջակցի Թրամփի Գազայի հատվածի խաղաղության ծրագրին։

ԱՄՆ զինվորականները պատրաստել են Գազայի հատվածը երկու մասի բաժանելու ծրագիր: Վերակառուցումը կսկսվի միջազգային և իսրայելական ուժերի կողմից վերահսկվող «Կանաչ գոտում», մինչդեռ «Կարմիր գոտին», որտեղ գրեթե ամբողջ պաղեստինյան բնակչությունը կտեղափոխվի, կմնա ավերակների մեջ: Այս մասին հաղորդել է բրիտանական The Guardian թերթը ուրբաթ՝ նոյեմբերի 14-ին՝ հղում անելով փաստաթղթերին և աղբյուրներին:

Միջերկրական ծովին նայող ներքին մասը կնշանակվի «կարմիր»։ Այն կներառի Խան Յունիս, Գազա և Դեյր էլ-Բալահ խոշոր քաղաքները։ Երկու գոտիները կբաժանվեն «դեղին գծով»՝ այն գծով, որով Իսրայելի պաշտպանության բանակի ուժերը նահանջել են Շարմ էլ-Շեյխի խաղաղության համաձայնագրից հետո։

ԱՄՆ ռազմական ծրագիրն է՝ համոզել պաղեստինցի քաղաքացիներին ապագայում կամավոր վերադառնալ Իսրայելի կողմից վերահսկվող տարածքներ։

Ավելին, ինչպես նշվում է հոդվածում, ԱՄՆ ռազմական հրամանատարությունը պատրաստել է ծրագիր՝ Գազայի հատվածում միջազգային կայունացման ուժերին եվրոպական զորքեր ներգրավելու համար։