«Լորիկ»-ը դրամահավաք է հայտարարել «Ազնավուր Սաղյան» հիմնադրամի համար

«Լորիկ» մարդասիրական հիմնադրամը վերջերս հայտարարեց Ազնավուր Սաղյանի անվան կրթաթոշակային հիմնադրամի ստեղծման մասին։

«Կրթաթոշակային հիմնադրամի նպատակն է օգնել Մարտունու երիտասարդ ուսանողներին շարունակել իրենց կրթությունը՝ չնայած Արցախից տեղահանության հետ կապված դժվարություններին։

Աջակցելով նրանց կրթությանը՝ դուք հույս և հնարավորություն եք տալիս նրանց, ովքեր ձգտում են սովորել և զարգանալ։ Այս նախաձեռնությունը «Լորիկ» մարդասիրական հիմնադրամի մեր առաքելության անկյունաքարն է։

Ֆոնդի հասույթը նախատեսված է ուսման վարձի, դպրոցական պարագաների և կրթական աջակցության համար՝ ուսանողներին հնարավորություն տալով իրականացնել իրենց երազանքները։ Օգնեք մեզ կրթության միջոցով խթանել դիմացկունությունն ու նպատակասլացությունը։

Ֆոնդը անվանակոչվել է Մարտունու քաղաքապետ Ազնավուր Սաղյանի պատվին, ով հերոսաբար զոհվեց՝ պաշտպանելով Մարտունու բնակիչներին 2023 թվականի սեպտեմբերի 19-ին ադրբեջանական ագրեսիայի ժամանակ», – ասվում է հայտարարության մեջ։

Հիշեցնենք, որ «Լորիկ» մարդասիրական հիմնադրամը ստեղծվել է 2020 թվականին՝ 44-օրյա պատերազմից անմիջապես հետո։

Կազմակերպության հիմնադիրը Շանթ Չարշավչեանն է՝ հայազգի ամերիկացի, որի նախնիները սերում են Արևմտյան Հայաստանից՝ հինավուրց Տիգրանակերտ քաղաքից։ Մինչև 2023 թվականի սեպտեմբերը հիմնադրամը Արցախում իրականացրել է տարբեր ծրագրեր, այդ թվում՝ բնակչության սոցիալական աջակցություն, ազգային և մշակութային արժեքների պահպանում և զարգացում, սպորտ և այլն։ Արցախից տեղահանումից որոշ ժամանակ անց, հաշվի առնելով այն փաստը, որ արցախցիները, այդ թվում՝ Արցախյան պատերազմներում զոհված հերոսների ընտանիքները, հայտնվել են ծանր վիճակում՝ առանց ապաստանի և ապրուստի միջոցների, որոշում է կայացվել շարունակել հիմնադրամի գործունեությունը։ Մասնավորապես, հիմնադրամի միջոցներն օգտագործվել են զոհվածների ընտանիքների և այլ կարիքավոր հայերի համար բնակարաններ գնելու և վերանորոգելու համար։ «Լորիկ» մարդասիրական հիմնադրամի շնորհիվ տասնյակ արցախյան ընտանիքներ արդեն ունեն իրենց սեփական տանիքը։

Միակ պայմանն այն է, որ բնակարանները մնան հիմնադրամի սեփականությունը 10 տարի, որից հետո ընտանիքները կստանան սեփականության իրավունք։ Մարզերում հիմնադրամը ստեղծում է համայնքային կյանքի պայմաններ արցախցիների համար՝ հնարավորություն տալով նրանց պահպանել իրենց կենսակերպը, ավանդույթները և մշակույթը։ Լայնածավալ աշխատանքներ են տարվում նաև Արցախի ոչ նյութական մշակութային և պատմական ժառանգության պահպանման ուղղությամբ, ի թիվս այլ բաների: Հիմնադրամի աշխատանքի մասին ավելի մանրամասն տեղեկություններ կարող եք գտնել կազմակերպության պաշտոնական կայքում՝ www.lorikhf.org։

Արսեն Աղաջանյան