Այն ֆոնին, որ Բաքուն արդեն նախապատրաստում է ենթակառուցվածքը Մեղրիի միջանցքի ճեղքմանը՝ հայտարարելով, որ ստացել է Փաշինյանի համաձայնությունը, Իրանը ադրբեջանական պատվիրակությանը հրավիրել է իր 65-րդ հատուկ նշանակության օդադեսանտային բրիգադի (NOHED) բազա։
Նշվում է, որ ադրբեջանական պատվիրակությունը ծանոթացել է այս բրիգադի մարտական հնարավորություններին ու պատրաստվածությանը։ «Ահաբեկչական խմբավորումներին հակազդելը և Արևմտյան Ասիայում բոլոր սպառնալիքներն ու տեղաշարժերը վերահսկելը 65-րդ բրիգադի մասնագիտություններից մեկն է»,- գրում է Mehr-ը։
Հասարակության ուշադրությունը Տավուշի վրա կենտրոնացնելը մի քանի խնդիր է լուծում՝ փլուզել ամրացված պաշտպանական գիծը և պատրաստել ցատկահարթակ Մեղրի ճանապարհի և Ջերմուկ-Երասխ-Երևան-Մարգարա միջանցքի ճեղքման համար։
Մի քանի օրից Փաշինյանը կմեկնի Մոսկվա, որտեղ կվարի ԵԱՏՄ խորհրդի նիստը։ Ապրիլի վերջին Ալիևն է այցելել Մոսկվա և Պուտինի հետ հիմնականում խոսել երկաթուղու մասին՝ չմոռանալով նշել Զանգեզուրի միջանցքը։
Իրանն առայժմ միակ ուժն է, որը դեմ է այս միջանցքին։ Հայաստանում Իրանի դեսպան Մեհդի Սոբհանին վերջերս ասել է. «Հայաստանն Իրանի շնչուղին է դեպի հյուսիս և Սև ծով, իսկ Իրանը Հայաստանի համար շնչուղին է դեպի հարավ, դեպի Պարսից և Օմանի ծոցեր, դեպի Հնդկաստան»:
Նա կրկնել է, որ Իրանի համար անընդունելի են «աշխարհաքաղաքական սահմանները խախտելու» ռազմական փորձերը։
Թեհրանը հրավիրել է Բաքվի զինվորականներին՝ ցույց տալու, թե ինչպես է պայքարելու դրա դեմ։