Կառավարությունը պատրաստ է եւս մեկ ամիս երկարաձգել 50 հազ․ աջակցությունը, բայց մենք պետք է վրանը հանենք
- 21:36 08.04.2025
Փոխվարչապետ Տիգրան Խաչատրյանն արցախցիների ներկայացուցիչներին առաջարկել է Ազատության հրապարակից հանել արցախցիների տեղադրած վրանը, փոխարենը առաջարկել է, որ կառավարությունը եւս մեկ ամսով կերկարաձգի արցախցների 50 հազարական դրամ աջակցության ծրագիրը։ Այս մասին Ազատության հրապարակում ասել է Արցախցիների իրավունքների պաշտպանության խորհրդի անդամ Նժդեհ Իսկանդարյանը։
«Երեկ մենք հանդիպել ենք փոխվարչապետի հետ, քննարկել ենք սոցիալական հարցեր։ Նրանք պատրաստակամություն են հայտնել եւս մեկ ամիս երկարաձգել 50 հազար դրամ աջակցությունը, բայց նախապայմանով, որ պետք է վրանը հանենք։ Այսօր մենք խորհրդի անունից պատասխանել ենք իրենց, որ նպատակահարմար չենք գտնում, հատկապես, որ բազմաթիվ արցախցիներ գալիս են այստեղ, շփվում ենք, իրենց մտահոգություններն ու կարծիքներն ենք լսում։ Փորձելու ենք մինչեւ ամսի 15-ը հանդիպումներ կազմակերպել արցախյան եւ հայաստանյան քաղաքական ուժերի հետ, ովքեր կհամախմբվեն մեր օրակարգի շուրջը։ Որից հետո հայտարարելու ենք մեր հանրահավաքի մասին։ Եվ եթե մինչ այդ կառավարությունն իր դիրքորոշումը չփոխի, անցնելու ենք հստակ գործողությունների»,- ասել է Նժդեհ Իսկանդարյանը։
Ապրես Մարգարյանն էլ հիշեցրել է, որ իրենց պահանջները միայն սոցիալական չեն, իրենք ներկայացրել են 12 կետանոց պահանջներ, որոնց մեծ մասը քաղաքական ու իրավական պահանջներ են։