ՀՀ արդարադատության նախարար Սրբուհի Գալյանը ճեպազրույցի ժամանակ նշեց, որ «կառավարությունը պատրաստ է խաղաղության պայմանագիր կնքել, սակայն հնչած մտքերը նախապայման չեմ համարում։ Խաղաղությունն այլընտրանք չունի, և մեր բոլոր գործողությունները պետք է ուղղված լինեն դրա վերջնական հաստատմանը”։

Ավելի վաղ Բաքուն հայտարարել էր, որ դեռ երկու տարի առաջ է որպես «խաղաղության համաձայնագրի» ստորագրման նախապայման առաջ քաշել ԵԱՀԿ Մինսկի խմբի վերացումը և Հայաստանի Սահմանադրության փոփոխությունները, մասնավորապես՝ Անկախության հռչակագրին և Հայաստանի ու Արցախի վերամիավորման որոշմանը հղումների բացառումը։

Այն,որ նախարարը “չի ընդունում” դա որպես նախապայման, չի նշանակում, որ այդ “առաջարկները” չեն կատարվելու։

Մեկնաբանելով սահմանադրական բարեփոխումների հարցը՝ նախարարը հիշեցրեց, որ նոր տեքստի վրա աշխատանքները շարունակվում են։ Նա մանրամասներ չհրապարակեց՝ նշելով, որ նախագիծը որոշակի փուլում կհրապարակվի և կենթարկվի հանրային քննարկման։ Նրա խոսքով, Սահմանադրության վերջնական տարբերակը պատրաստ կլինի 8-10 ամսվա ընթացքում։

Գալյանը հրաժարվեց մեկնաբանել, թե արդյոք Անկախության հռչակագրի հղումը կմնա տեքստում: Նա հավելեց, որ իր անձնական դիրքորոշումը համահունչ է Սահմանադրական դատարանի եզրակացությանը։

Այսպիսով, Բաքուն հրաժարվում է ստորագրել «համաձայնագիրը», քանի դեռ չի փոխվել ՀՀ Սահմանադրությունը, իսկ Երևանը պնդում է, որ դրա համար կպահանջվի առնվազն 8-10 ամիս։

Մոտավորապես այսքան ժամանակ է մնացել Հայաստանում նախընտրական քարոզարշավի մեկնարկին, երբ, ըստ Վիլեն Գաբրիելյանի, երկրում իշխանություն կփոխվի։

Կփոփոխվի, թե չի փոխվի, բայց Երեւանն, ըստ էության, առաջարկում է սպասել գոնռ մինչև ընտրություններ եւ խորհրդարանական ընտրություններին զուգահեռ անցկացնել սահմանադրական հանրաքվե։ Բայց քանի որ սահմանադրական հանրաքվեն, ըստ նախապայմանի, ենթադրում է Երրորդ Հանրապետության վերացում, հանրաքվեից հետո հայկական իշխանություն չի կարող լինել։

Միջազգային դերակատարները, ովքեր ողջունում էին Բաքվի և Երևանի միջև «խաղաղության համաձայնագրի» տեքստի համաձայնեցումը, երբեք հրապարակավ չեն հայտարարել Բաքվի նախապայմաններին աջակցելու մասին, թեև անթույլատրելի էլ չեն համարել։ Բոլորը հիանալի հասկանում են, որ որոշվում է ոչ թե տխրահռչակ խաղաղության պայմանագրի, այլ Հայաստանի ճակատագիրը։

Եվրոպական խորհրդարանը ապրիլի 3-ին Հայոց ցեղասպանության 110-րդ տարելիցին նվիրված նիստ է անցկացրել՝ միաժամանակ լրջագույն ուշադրություն դարձնելով Լեռնային Ղարաբաղից էթնիկ հայերի բռնի տեղահանությանը։ Այս մասին հայտնում է Հանուն արդարության և ժողովրդավարության Եվրոպայի հայկական ֆեդերացիան։

Եվրոպացի պատգամավորները համեմատական են անցկացրել Հայոց ցեղասպանության և վերջին տարիների դեպքերի միջև՝ նշելով, որ վերջին իրադարձությունները Թուրքիայի ու Ադրբեջանի՝ պատմական պատասխանատվության չկրելու վտանգավոր հետևանքներն են։

«Ճանաչումն ու հաշտեցումը քաջություն են պահանջում անցյալին դիմակայելու և ապագան պատմական ճշմարտության վրա կառուցելու համար։ Սա հատկապես կարևոր է այսօր, երբ հարյուր հազարավոր մարդիկ ստիպված են եղել լքել Լեռնային Ղարաբաղը՝ Ադրբեջանի վայրագությունների հետևանքով»,- նշել է ԵԺԿ խմբակցությունից Միրիամ Լեքսմանը։

«Սոցիալիստների և դեմոկրատների առաջադիմական դաշինք» խմբակցությունից Յանիս Մանիատիսը պատմել է իր ընտանիքի ողբերգական փորձը Օսմանյան կայսրությունում։

«Հիշողության և ճանաչման բացակայությունը հանգեցնում է անցյալի կրկնությանը։ Լեռնային Ղարաբաղի դեպքերն այսօրվա ցավալի հիշեցումն են»,- ընդգծել է նա։

Նիստի ընթացքում պատգամավորները վերահաստատել են, որ Լեռնային Ղարաբաղում տեղի ունեցած էթնիկ զտումներն անթույլատրելի են, և կոչ են արել ԵՄ-ին որդեգրել սկզբունքային արտաքին քաղաքականություն, որը մարդու իրավունքներն ու միջազգային իրավունքը վեր կդասի քաղաքական և տնտեսական շահերից։

Բելգիայի Ներկայացուցիչների պալատի Արտաքին հարաբերությունների հանձնաժողովը ապրիլի 2-ին կարևոր լսումներ՝ քննարկելու Լեռնային Ղարաբաղի վերաբերյալ բանաձևի նախագիծ, որ ներկայացվել է պատգամավորներ Էլս Վան Հուֆի և Միշել Դե Մաեգդի կողմից։ 

Հայկական կողմից ելույթ են ունեցել Բելգիայի Թագավորությունում ՀՀ դեսպան Տիգրան Բալայանը, նախկինում Ֆրանսիայում Արցախի Հանրապետության ներկայացուցիչ Հովհաննես Գևորգյանը և ՀՅԴ Հայ դատի Եվրոպայի գրասենյակի նախագահ Գասպար Կարապետյանը։

Գասպար Կարապետյանը ընդգծել է՝ Լեռնային Ղարաբաղի Հանրապետության անկախության հիմքը դրված է ԽՍՀՄ-ի 1990 թվականի ապրիլի 3-ի օրենքի վրա՝ «Միութենական հանրապետությունների դուրս գալու հետ կապված հարցերի կարգավորման մասին»։

Կարապետյանը հավելել է, որ «Ալմա-Աթա»-ի իրավական ուժը հիմնված էր ԱՊՀ-ի ստեղծման արձանագրությունների ընդունման վրա, որոնց վավերացումը Հայաստանի կողմից ներառում էր հատուկ ձևակերպում այն մասին, որ Լեռնային Ղարաբաղը չպետք է գտնվի Ադրբեջանի իշխանության տակ։

Այս հարցի շուրջ Կարապետյանը քննադատել է Հայաստանի վարչապետ Նիկոլ Փաշինյանի դիրքորոշումը՝ նշելով, որ նրա ընդունած բազմաթիվ զիջումներն ուժեղացրել են Ադրբեջանի պահանջները և նպաստել լարվածության աճին։ Նա նաև տեղեկացրել է հանձնաժողովի անդամներին այն նախապայմանների մասին, որոնք Ադրբեջանը պարտադրում է Հայաստանին՝ չնայած երկու երկրների միջև խաղաղության պայմանագրի ստորագրման մասին հայտարարությանը։

Անընդունելի պահանջների թվում են՝
• Հայաստանի բանակի զինաթափումը,
• Հայաստանի սահմանադրության փոփոխումը,
• կամայական մեծ ֆինանսական փոխհատուցումների պահանջը,
• Ադրբեջանի պահանջը՝ Հայաստանը Բաքվին հանձնի բոլոր նախկին նախագահներին՝ որպես ահաբեկիչների դատելու համար։

Կարապետյանը բարձր է գնահատել Շվեյցարիայում վերջերս ընդունված որոշումը, որը պարտավորեցնում է շվեյցարական կառավարությանը բաց երկխոսություն նախաձեռնել Ադրբեջանի և Լեռնային Ղարաբաղի ներկայացուցիչների միջև։

Գասպար Կարապետյանի ելույթից հետո բազմաթիվ պատգամավորներ հարցեր ուղղել են հարցեր, հատկապես Լեռնային Ղարաբաղից տեղահանված հայ փախստականների հարցի շուրջ՝ շեշտելով, որ անհրաժեշտ է ավելացնել ԵՄ-ի և Բելգիայի կողմից տրամադրվող հումանիտար օգնությունը։

Պատգամավորները ճշտել են նաև, թե ինչ պայմանների դեպքում փախստականները  կարող են վերադառնալ Լեռնային Ղարաբաղ։

Բանաձևի նախագծի քվեարկությունը նախատեսվում է անցկացնել Բելգիայի Դաշնային Խորհրդարանում՝ մայիսի վերջում։

ԱՄՆ Կոնգրեսում ևս պատասխանատվություն են պահանջել հայության նկատմամբ իրագործված ցեղասպանությունների համար, կարևորել արցախահայության վերադարձի իրավունքի իրացումը

Ապրիլի 2-ին ԱՄՆ Կոնգրեսում անցկացվել է  Հայոց ցեղասպանության ամենամյա ոգեկոչման միջոցառումը: Վերջինիս մասնակից՝ Կոնգրեսի երկու կուսակցությունները ներկայացնող պաշտոնյաները, պահանջել են Ադրբեջանի կողմից հայ ռազմագերիների անհապաղ ազատ արձակում, տեղահանված արցախահայերի վերադարձի իրավունքի ապահովում, ինչպես նաև ԱՄՆ-ի պատժամիջոցներ Ալիևի և Էրդողանի վարչակարգերի նկատմամբ՝ նրանց պատերազմական հանցագործությունների և ցեղասպանական էթնիկ զտումների համար:

Ոգեկոչման միջոցառումը, որը կրում էր «Հետադարձ հայացք 2023 թվականի Արցախի ցեղասպանությանը․ Հայոց ցեղասպանության (1915-1923թթ․) հիշատակում» խորագիրը, տեղի է ունեցել ԱՄՆ Կոնգրեսի այցելուների կենտրոնի դահլիճում:

Միջոցառումը կազմակերպվել էր Կոնգրեսի հայկական հարցերով հանձնախումբը՝ Հայ դատի Ամերիկայի հանձնախմբի ու Ամերիկայի հայկական համագումարի աջակցությամբ: Ապրիլի 1-ին և 2-ին հարյուրավոր ակտիվիստներ հանդիպեցին իրենց սենատորների և կոնգրեսականների հետ՝ քննարկելու հայանպաստ օրենսդրական նախագծերը:

Հայ դատի հանձնախմբի ներկա առաջնահերթություններն են․

• Կասեցնել ԱՄՆ ռազմական օգնությունը Ադրբեջանին,
• Կիրառել «Մագնիցկու պատժամիջոցներ» ադրբեջանցի ռազմական հանցագործների նկատմամբ,
• Ապահովել հայ ռազմագերիների ազատ արձակումը,
• Միջազգային պաշտպանության ներքո ապահովել Արցախի տեղահանված հայերի վերադարձի իրավունքը
• Պաշտպանել արդար և կայուն խաղաղությունը, որը մերժում է ուժի սպառնալիքները և երաշխավորում է Հայաստանի ինքնիշխանությունը:

Հայ դատի Ամերիկայի հանձնախումբը շարունակում է պահանջել պատասխանատվություն Թուրքիայի և Ադրբեջանի կողմից իրականացված ցեղասպանական քաղաքականությունների համար և ԱՄՆ իշխանություններին կոչ է անում ձեռնարկել վճռական քայլեր՝ հակազդելու նրանց ոճրագործություններին:

Մեծ Բրիտանիայի խորհրդարանի անդամ, Մեծ Բրիտանիայի խորհրդարանում Հայաստանի հետ խորհրդարանական բազմակուսակցական խմբի նախագահ Ջեսիկա Մորդենը , խմբի փոխնախագահներ Ջոն Ուիթինգդեյլը, Կրիս Լոուն եւ Լորդ Մարկ Մաքինսը նամակ են հղել Բրիտանիայի կառավարությանը՝ խնդրելով աջակցել Բաքվում պահվող հայ բանտարկյալների ազատ արձակմանը։

Բրիտանացի խորհրդարանականները խստորեն դատապարտում են Բաքվում պահվող հայ պատանդներին “դատավարությունները” եւ կոչ են անում Մեծ Բրիտանիայի կառավարության ճնշում գործադրել Ադրբեջանի վրա նրանց ազատ արձակելու համար։

Իսկ Կանադայի արտգործնախարար Մելանի Ժոլին գրել է․

Արցախում (Լեռնային Ղարաբաղ) հակամարտությունը մնում է չլուծված։ Կանադայի կոչը վճռորոշ նշանակություն ունի այս հարցի` համաշխարհային օրակարգում առաջնային մնալու համար:  Հելսինկյան սկզբունքներով առաջնորդվող իրական բանակցությունների միջոցով, ներառյալ Արցախի ժողովրդի ինքնորոշման հիմնարար իրավունքը, պետք է հասնել հիմնական լուծման, գրել է Կանադայի Արտաքին գործերի նախարարը։

«Տևական կարգավորմանը հնարավոր է հասնել միայն դիվանագիտության և միջազգային իրավունքի հարգման միջոցով»,- նշել է Կանադայի արտգործնախարարը։

Կանադայի արտաքին գործերի նախարար Մելանի Ջոլին հանդես է եկել հատուկ հայտարարությամբ նաև Արցախի հայաթափման առաջին տարելիցի կապակցությամբ։

«Ամենակարեւորը մեզ համար այն է, որ մեր կարծիքը պետք է հաշվի առնվի։ Մինչեւ հիմա Հայաստանի իշխանությունները մեր վերաբեյալ որոշումներ են կայացրել առանց մեր կարծիքը հաշվի առնելու»,- այսօր լրագրողների հետ զրույցում ասաց Արցախի նախկին պետնախարար Արտակ Բեգլարյանը։

Նա հավելեց, որ հիմա արդեն Արցախից բռնի տեղահանված անձանց համբերության բաժակը լցվել է։ «Մենք դուրս ենք եկել փողոց, պարզապես պահանջում ենք, որ եկեք մեր կարծիքը հաշվի առեք, որովհետեւ ձեր որոշումներն ազդում են մեր կյանքի վրա, մեր իրավունքների վրա»,- նշեց նա։

Արտակ Բեգլարյանն անդրադրաձավ նաեւ արցախցիների նկատմամբ գեներացվող ատելությանը, որը իշխանության մակարդակով է տեղի ունենում։ Նա ասաց, որ իրենք պահանջում են նաեւ պատասխանատվության ենթարկել ատելության քարոզ իրականացնողներին։

«Մենք էլ շատ լավ տեսնում ենք, որ հիմնականում իշխանության ներկայացուցիչների կողմից է հենց հրապարակային կերպով նմանատիպ ատելության քարոզ գեներացվում արցախցիների դեմ։ Մենք՝ որպես խորհուրդ, պայքարելու ենք նաեւ դրա դեմ եւ բոլոր միջոցները կիրառելու ենք, որ ատելության քարոզ գեներացնողները պատասխանատվության ենթարկվեն։ Իսկ արցախցիներին, որոնք ատելության քարոզի զոհ են դառնում, ուղղակի խնդրում ու հորդորում եմ զուսպ լինել, որեւէ կերպ չտրվել սադրանքներին։ Հնարավոր ամեն ինչ պետք է անենք, որն սիրով ու հարգանքով վերաբերվենք մեր բոլոր հայրենակիցներին։ Թշնամանքի դեմ թշնամանքով չպետք է պայքարենո, որովհետեւ ժամանակը գալու է, եւ բոլորն իրենց պատասխանատվությունը կրելու են»,- ասաց Բեգլարյանը։