ԱՄՆ նախագահի թեկնածու Դոնալդ Թրամփը զանգահարել է Մեծի տանն Կիլիկիո Արամ Ա կաթողիկոսին, հաղորդում են կաթողիկոսությունից։

Ըստ հաղորդագրության՝ Թրամփը վերահաստատել է իր աջակցությունն Արցախի հայերին և տարածաշրջանում խաղաղություն հաստատելու ջանքերին։

ԱՄՆ-ում կայանալիք ընտրություններին ընդառաջ կայացած այս հեռախոսազրույցի ժամանակ նախագահի թեկնածուն նաև ողջունել է ամերիկահայ համայնքը։

Մոտ 10 օր առաջ էլ նախկին նախագահը հայտարարել էր, որ երբ դառնա նախագահ, կվերականգնեն խաղաղությունը Հայաստանի և Ադրբեջանի միջև՝ չնշելով, թե ինչպես է դա անելու։

«Երբ ես դառնամ նախագահ, կպաշտպանեմ հետապնդման ենթարկվող քրիստոնյաներին, կաշխատեմ դադարեցնել բռնությունն ու էթնիկ զտումը, մենք կվերականգնենք խաղաղությունը Հայաստանի ու Ադրբեջանի միջև»,- գրել էր նա, միևնույն ժամանակ քննադատել իր մրցակից, գործող փոխնախագահ Քամալա Հարիսին, մեղադրել ադրբեջանական անցած տարվա հարձակման օրերին անգործության համար, Լեռնային Ղարաբաղի մասին խոսելիս էլ Արցախ գրել:

Մեծի Տանն Կիլիկիո կաթողիկոսության փոխանցմամբ՝ Արամ Ա կաթողիկոսը շնորհակալություն է հայտնել «Արցախի հայության իրավունքների վերաբերյալ նրա հրապարակային հայտարարության համար»՝ ընդգծելով Միացյալ Նահանգների միջազգային դերակատարության կարևորությունը։

Նա Դոնալդ Թրամփին ասել է, որ անհրաժեշտ է՝ ԱՄՆ նոր կառավարությունն ամբողջական զորակցություն հայտնի իր պատմական հողերը վերադառնալու և ինքնորոշման իրավունքը վերահաստատելու Արցախի հայության արդար պահանջին՝ «հաշվետվություն պահանջելով արցախահայության դեմ գործադրված ցեղասպանության համար», ինչպես նաև նոր կառավարության մեջ ընդգրկված լինի ամերիկահայ համայնքը ներկայացնող անձ։

Իրանի խորհրդարանի ազգային անվտանգության հանձնաժողովի անդամ Էսմայիլ Կոսարին Didban Iran-ի հարցազրույցում հայտնել է, որ Ազգային անվտանգության բարձրագույն խորհրդի անդամները որոշում են ընդունել Իսրայելի ռազմական պատասխանի վերաբերյալ։

Ընդ որում, Կոսարին հերքել է տեղեկությունը, որը հայտնվել է վերջերս արեւմտյան ԶԼՄ-ներում, որի համաձայն՝ Իրանը հարված կհասցնի առաջիկայում, որոշակի ժամկետում։

«Իրանի պատասխանը Իսրայելի ագրեսիային իրավունքի հարց է, որը մեզ համար հստակ որոշված է, եւ այն, թե ինչպես ենք գործելու, կախված է պլանից, իսկ ժամկետներն ու նպատակները թողնվել են մշակողների հայեցողությանը»,- ասել է նա։

Իրանի գերագույն հոգևոր առաջնորդ այաթոլա Ալի Խամենեին Միացյալ Նահանգներին և Իսրայելին սպառնում է ջախջախիչ պատասխանով Իրանի դեմ գործողությունների համար։

Խամենեիի այս խոսքերը հաջորդում են Իրանի ու Իսրայելի փոխադարձ օդային հարվածներին: Ի պատասխան Իրանի կողմից հոկտեմբերի 1-ի հրթիռակոծման՝ Իսրայելը մեկ շաբաթ առաջ պատասխան հարվածներ հասցրեց։ Այժմ, իր հերթին, Թեհրանն է խոստանում հակահարված տալ։

«Սա միայն վրեժի մասին չէ, խոսքը տրամաբանական գործողությունների մասին է․ առճակատում, որը հիմնված է հավատքի, բարոյականության, իսլամական իրավունքի վրա, ինչը համահունչ է միջազգային իրավունքին», – ասել է Իրանի հոգևոր առաջնորդը։

Վրաստանում ավարտվեցին աղմկահարույց ընտրությունները, և թեև այսօր դեռևս նախատեսված է հերթական բողոքի ցույցը, սակայն ակնհայտ է, որ Վրաստանում ընտրությունների արդյունքները վերանայելու ներքին ռեսուրս չկա։ Միակ հույսը Եվրոպան է։ Իսկ Եվրոպան, ինչպես պարզվեց, չունի Վրաստանի գործերին միջամտելու ոչ գործիքներ, ոչ էլ ներքին հարթակ։

Նախագահ Սալոմե Զուրաբիշվիլին Արևմուտքին կոչ է անում ճնշում գործադրել իշխող «Վրացական երազանք» կուսակցության վրա՝ վերանայելու «գողացված ընտրությունների» արդյունքները։ «Եթե ճնշում չկիրառվի, դա կնշանակի, որ Արևմուտքը այնքան էլ չի արել, որ փորձի Վրաստանը պահել արևմտյան կողմում և եվրոպական հեռանկարով»,- ընդգծել է Վրաստանի նախագահը։ Սա հնչեց ոչ միայն որպես նախատինք, այլեւ կապիտուլյացիայի նախազգուշացում։

Մեր պահանջն է, որ շտապ ժամանի Եվրամիության հետաքննող հանձնաժողովը,- ասել է «Ուժեղ Վրաստան» կոալիցիայի առաջնորդներից Աննա Դոլիձեն։ «Տուժողների և վկաների վրա ճնշման վտանգ կա։ Ուստի մենք պահանջում ենք, որ ԵՄ հետաքննող հանձնաժողովը շտապ ժամանի»,- ասել է Աննա Դոլիձեն։

ԵՄ-ն չհայտարարեց «հետաքննող հանձնաժողով» ուղարկելու իր մտադրության մասին և չհրաժարվեց ճանաչել Վրաստանի ընտրությունները՝ սահմանափակվելով հաղթանակած Վրացական երազանքին չշնորհավորելով։

Ավելին, ԵՄ-ն որոշեց կասեցնել Վրաստանի՝ ԵՄ-ին անդամակցելու գործընթացը և որպես «վերսկսման» պայման առաջ քաշեց օտարերկրյա գործակալների և փոքրամասնությունների քարոզչության արգելքի մասին վերջերս ընդունված օրենքների հետ կանչելը։

«Վրացական երազանքի» գործադիր քարտուղար Մամուկա Մդինարաձեն արդեն հայտարարել է, որ «Վրացական երազանքը» չի չեղարկի «Օտարերկրյա ազդեցության թափանցիկության մասին» օրենքը։

Վրաստանում և այլուր մարդիկ հարց են տալիս՝ ինչո՞ւ են եվրոպացիները որպես բանակցությունների վերսկսման «պայման» առաջ քաշում ոչ թե ընտրությունների արդյունքների վերանայում, այլ ԼԳԲՏ քարոզչության արգելքի վերացումը։ Եւ ի՞նչ են արել Վրաստանի «արևմտյան ընտրության» համար հազարավոր կառույցներ, որոնք տարիներ շարունակ ֆինանսավորվել են Արևմուտքից։

Եվրատլանտյան կառույցների` հետխորհրդային ժողովուրդների նկրտումների և աշխարհաքաղաքական ընտրությունների իրականացման անկարողությունը հանգեցրեց մեկ այլ դրամայի, այս անգամ Վրաստանում:

ԽՍՀՄ-ի փլուզումից հետո արևմտյան հիմնադրամներն ու կառավարությունները սկսեցին մեծ ներդրումներ կատարել հետխորհրդային երկրներում ժողովրդավարության և թափանցիկության զարգացման համար: Սա իր ազդեցությունն ունեցավ հատկապես լրատվամիջոցների և քաղաքացիական սեկտորի զարգացման առումով։ Բայց ինչ-որ պահի այդ ներդրումները դարձան բյուրոկրատական ​​աննպատակ իներցիայի մաս։ Իսկ հետխորհրդային երկրներում քաղաքացիական հասարակությունները սկսեցին նմանվել տոտալիտար աղանդներին, որոնք «յուրացրել» էին քաղաքացիական տարածքը և իրենց անհիմն թույլ էին տալիս խոսել ողջ հասարակության անունից։

Նկարված «պատկերը» արագ քանդվեց, երբ ռուսական տոտալիտար մեքենան թափ հավաքեց՝ ընդհուպ մինչեւ ռազմական գործողություններ հետխորհրդային երկրներում՝ Վրաստանում, Ուկրաինայում, հետո Արցախում և նորից Ուկրաինայում։ Այն ժամանակ արևմտյան կառավարություններն ու հիմնադրամները պետք է վերանայեին ֆինանսական աջակցության սկզբունքները և նպատակներ դնեին։ Բայց բյուրոկրատական ​​իներցիան ավելի ուժեղ եղավ, և այժմ արևմտյան երկրները կանգնած են այն փաստի առաջ, որ այն երկրներում, որտեղ զգալի միջոցներ են ներդրել, նույնիսկ նվազագույն հարթակ չունեն աշխարհաքաղաքական շրջադարձ իրականացնելու համար։

Նույն գործընթացը տեղի է ունենում Հայաստանում, որտեղ Արևմուտքը բախվում է կոգնիտիվ դիսոնանսի՝ ռուս-թուրքական դաշինքի քաղաքականություն վարող «արևմտամետ» իշխանություն, հորից առաջ ռուսական դժոխք ձգող համակարգային ընդդիմություն և իներտ «քաղաքացիական հասարակությունը», որը գրեթե ձուլվել է իշխանությունների հետ։