Փաշինյանը փորձում է համոզել հայ ժողովրդին հրաժարվել  «զոհի» հոգեբանությունից, մոռանալ անցյալը և առաջ նայել, միաժամանակ խոստովանում է, որ շարունակում է զոհաբերել հայկական հողերը, իրավունքները եւ շահերը։

«Երբեմն թվում է, թե հայերի միջազգային գործառույթն է դարձել զոհ գնալը, հայերի համար անելու այլ բան չկա, և միջազգային կոնսենսուս կա այս հարցում։ Մենք փորձում ենք փոխել այդ ճակատագիրը մեր ժողովրդի համար», – պնդում է Փաշինյանը։

Միեւնույն ժամանակ նա խոստովանում է, որ բազմաթիվ «զոհաբերությունների» է գնացել, հատկապես, հանձնելով Արցախը։ Հիմա էլ փորձում է “զոհաբերել” Ցեղասպանությունից տոժածների ժառանգների իրավունքները։

Նա ասել է, որ «44-օրյա պատերազմում պարտության միջով անցնելով ենք ձեռք բերել անկախ, ինքնիշխան պետություն ունենալու հնարավորություն»։ Նա խոստովանում է, որ Արցախը գիտակցաբար զոհաբերվել է «հանուն մնացած Հայաստանի»։

Ըստ Փաշինյանի՝ հիմա պետք է կենտրոնանանք այդ զոհողության հնարավորությունն օգտագործելու վրա. «Ես չէի ուզի նաև, որ այս վերլուծությունների արդյունքում գանք այն եզրակացության, որ մեր ընկած նահատակները, իրենց զոհողությունը ոչնչի մասին է եղել: Այդ զոհողությունները Հայաստանի անկախության և ինքնիշխանության համար են եղել, և մենք հիմա պարզապես պետք է կենտրոնանանք այդ զոհողության հնարավորությունն օգտագործելու վրա»:

“Զոհ չլինելու” Փաշինյանի կոչից կարելի է ենթադրել, որ հայերը ինքնակամ են զոհ դարձել, իրենք են իրենց կոտորել, տեղահանել Արցախից, եւ հենց որ հայերը իրենց զոհ չզգան, ամեն ինչ լավ կլինի։ Նման հոգեբանական աբսուրդը թույլ է տալիս չմեղադրել դահճին եւ նախապատրաստվել հաձորդ զոհաբերության։

Փաշինյանի 7 տարվա կառավարումը՝ անվերջ եւ գիտակցված զոհաբերում է հանուն մեկ չզոհաբերվող նպատակի՝ պահպանել իշխանությունը։ 

Դոնալդ Թրամփը ստանձնել է ուկրաինական և պաղեստինյան ճգնաժամերը լուծելու գործը իրեն բնորոշ բիզնես ձևով։

Թրամփն ասել է, որ ԱՄՆ-ը վերահսկողության տակ է առնելու Գազայի հատվածը։ Այս խոսքերը նա ասել է փետրվարի 4-ին Սպիտակ տանը՝ Իսրայելի վարչապետ Բենիամին Նեթանյահուի հետ հանդիպումից հետո։

«ԱՄՆ-ը վերահսկողության տակ կվերցնի Գազայի հատվածը, մենք կաշխատենք նրանց հետ»,- ասել է Սպիտակ տան ղեկավարը։ «Մենք կտնօրինենք այն, և մենք պատասխանատու կլինենք այնտեղից բոլոր վտանգավոր չպայթած ռումբերն ու այլ զենքերը հեռացնելու համար»:

Նրա խոսքերը հնչեցին Գազայի հատվածի ամբողջ պաղեստինցի բնակչությանը` ավելի քան երկու միլիոն մարդու, Հորդանան, Եգիպտոս և այլուր տեղափոխելու առաջարկից հետո:

«Եթե պետք լինի, կանենք, այս տարածքը կվերցնենք վերահսկողության տակ, կզարգացնենք, հազարավոր աշխատատեղեր կստեղծենք։ Սա մի բան կլինի, որով կարող է հպարտանալ ողջ Մերձավոր Արևելքը»,- հավելել է Թրամփը։ Հարցին, թե ով է ապրելու այնտեղ, հանրապետականը պատասխանել է, որ Գազայի հատվածը կարող է տուն դառնալ «խաղաղության մարդկանց համար», «Մերձավոր Արևելքի Ռիվիերա»:

«Նրանք այնտեղ են [Գազայում], քանի որ այլընտրանք չունեն: Ի՞նչ ունեն նրանք։ Այժմ դա փլատակների մեծ կույտ է», – ասել է Թրամփը։

«Գազայի հատվածի մեր ժողովուրդը թույլ չի տա, որ այդ ծրագրերն իրականացվեն։ Մենք պետք է վերջ տանք մեր ժողովրդի դեմ օկուպացիային և ագրեսիային, այլ ոչ թե վտարենք նրան իրենց հողից»,- ասել է ՀԱՄԱՍ-ի խոսնակ Սամի Աբու Զուհրին։

Բայց Նեթանյահուն դրական է ընդունել Թրամփի խոսքերը։ Իսրայելի վարչապետի խոսքով՝ Թրամփը «մտածում է ստանդարտից դուրս՝ թարմ գաղափարներով» և «ցուցադրում է ավանդական մտածողությունը ոչնչացնելու պատրաստակամություն»։

Ամռան վերջին ԱՄՆ նախագահ Դոնալդ Թրամփը Իսրայելի վարչապետ Բենիամին Նեթանյահուի հետ հեռախոսազրույցում Գազայի հատվածը անվանեց «առաջնային անշարժ գույք» և հարցրեց, թե ինչպիսի հյուրանոցներ կարող են կառուցվել այնտեղ, գրում է The Wall Street Journal-ը՝ վկայակոչելով բանակցություններին ծանոթ աղբյուրին:

Թրամփը Ուկրաինայի նախագահ Վլադիմիր Զելենսկու հետ զրույցում եւս քննարկել է անշարժ գույքի հարցը, մասնավորապես՝ Օդեսան անվանել է լավ վայր այս հատվածը զարգացնելու համար, WSJ-ին հայտնել է աղբյուրը։

Բացի այդ, Թրամփը վերջերս հայտարարեց Ուկրաինայի բնական ռեսուրսների փոխանակման պատրաստակամության մասին Կիևին շարունակվող ռազմական օգնության դիմաց: Ավելի վաղ Զելենսկին 2024 թվականին իր «Հաղթանակի ծրագրում» դաշնակիցներին առաջարկել էր մասնակցել Ուկրաինայում հազվագյուտ հողային մետաղների և այլ կարևոր օգտակար հանածոների զարգացմանը։ Թրամփի առաջարկից հետո Զելենսկին վստահեցրել է, որ Ուկրաինան «բաց» է Ուկրաինայում հանքային ռեսուրսների զարգացմանը օտարերկրյա գործընկերների և դաշնակիցների մասնակցության վերաբերյալ քննարկումների համար։

Այսպիսով, Թրամփը մտադիր է «բիզնես լուծումներ» գտնել Գազայի և Ուկրաինայի համար։ Թե որքանով դա հնարավոր կլինի, ցույց կտա ժամանակը։

Թրամփը բիզնես շահեր ունի՞ Հայաստանում, այդ թվում՝ Արցախում։ Ի՞նչ «գործարար առաջարկ» է Փաշինյանը բերել ԱՄՆ։ Ոսկին և այլ մետաղները Հայաստանում, այդ թվում՝ Արցախում, միշտ էլ հետաքրքրել են ԱՄՆ-ին։ Հիշենք Ամուլարի պատմությունն՝ իր տոննաներով ոսկու պաշարներով։ Գուցե պատահական չէ՞, որ վերջին օրերին ռուսական ընկերությանը պատկանող Զանգեզուրի պղնձամոլիբդենային կոմբինատում գործադուլներ են սկսվել։

«Ղարիբ Բաբայանի արարքում հանցագործություն առկա չէ, քրեական հետպնդում չպետք է հարուցվեր, եւ քրեական վարույթ չպետք է իրականացվի։ Իրականում պետք է պատժվեն Հանրապետության հրապարակում սադրողները, այսինքն՝ Իրանի քաղաքացիները՝ ազգությամբ ադրբեջանցիները, այլ ոչ թե այդ լկտիությանը բացասական, խրատական կամ քննադատող միտք արտահայտող անձը»,- Step1.am-ի հետ զրույցում ասաց արցախցի փաստաբան Դավիթ Հովհաննիսյանը։

Դավիթ Հովհաննիսյանը արցախցի դասախոս Ղարիբ Բաբայանի պաշտպաններից է։ Նա նշեց, որ նախաքննական գաղտնիքից ելնելով՝ չի կարող շատ մանրամասներ հայտնել գործի վերաբերյալ, այս փուլում համապատասխան գործողություններ են իրականացվում։

Նա ասաց, որ այս գործում քաղաքական ենթատեքստ կա Հանրապետության հրապարակում այդ անձանց հայտնվելու, «Ղարաբաղ» երգը երգելու մեջ։ Բայց Ղարիբ Բաբայանի արձագանքի տեսնակյունից քաղաքական ենթատեքստ ընդհանրապես առկա չէ։ «Եթե այդ տեսանյութը չհրապարակվեր Ղարիբ Բաբայանի կողմից եւ հրապարակվեր մեկ այլ անձի կողմից ու լայն տարածում ստանար, ինձ թվում է, դարձյալ նույն պատմությունը լինելու էր։ Այստեղ հարցն այն է, որ այդ գրառումը տեսանյութի հետ միասին շատ մեծ տարածում է ստացել, քանի որ տեսանյութը վիրավորում էր հայ մարդու արժանապատվությունը։ Այսինքն՝ ազգի մոտ էմցիոնալ ընկալում է եղել, մարդիկ հուզական են ընկալել այդ տեղեկատվությունը, քանի որ այդպիսի ֆոն առկա է․ Ադրբեջանն ասում է՝ Երեւանը «Իրեւան է», Հայաստանը՝ «արեւմտյան ադրբեջան»։ Այդ ֆոնի մեջ էլ տեղավորվում է նաեւ այս դեպքը»։

ՀՀ ԱԱԾ-ն հայտնել էր, որ Երեւանի Հանրապետության հրապարակում «Ղարաբաղ» երգը երգած եւ տեսանյութում պատկերված անձինք իրականում հանդիսանում են Իրանի Իսլամական Հանրապետության քաղաքացիներ՝ չնշելով ազգությունը։ Հարցին, թե ի՞նչ է պարզվել գործով՝ Հանրապետության հրապարակում երգողները Իրանի քաղաքացի ադրբեջանցի՞ներ են, Դավիթ Հովհաննիսյանը պատասխանեց, որ նախաքննական գաղտնիքի պատճառով չի կարող մանրամասներ հայտնել։ «Բայց իմ կարծիքով՝ եթե ադրբեջաներեն են երգել, ցանկացած հայի համար նրանք թուրք են, ադրբեջանցի են։ Տարբերություն չկա, թե ինչ ազգության են, անբարոյականություն է նման արարք թույլ տալը»,- ասաց նա։

Հիշեցնենք, որ արցախցի դասախոս Ղարիբ Բաբայանի նկատմամբ հանրային քրեական հետապնդում է հարուցվել այն բանից հետո, երբ նա իր սոցիալական ցանցում տարածել էր Երեւանի Հանրապետության հրապարակում ադրբեջաներեն «Ղարաբաղ» երգող անձանց վերաբերյալ տեսանյութը։

Ըստ Քննչական կոմիտեի՝ Ղարիբ Բաբայանը տարածել է «քաղաքական և այլ հայացքներով, անձնական և սոցիալական բնույթի այլ հանգամանքներով պայմանավորված՝ ՀՀ իշխանությունների և ՀՀ ոստիկանության ծառայողների նկատմամբ ատելություն, անհանդուրժողականություն և թշնամանք հրահրելուն ու քարոզելուն ուղղված նյութ և հրապարակային խոսք»։

Ռոզա Հովհաննիսյան