Իսրաելը հարվածել է Իրանի ռազմական օբյեկտներին, ինչպես ասում են՝ նախապես զգուշացնելով։ Իրանը հաղորդում է “սահմանափակ” վնասի մասին, իսկ Արևմուտքը հույս ունի, որ դա վերջին հարվածն է միմյանց։ Իսրայելը հավաստիացնում է, որ Իրանին այլեւս չի հարվածի։ Իրանը դեռ չի հայտարարել պատասխան հարվածի մասին։
Իսրայելական բանակի (ՑԱԽԱԼ) ներկայացուցիչ, դերծովակալ Դանիել Հագարին հավաստիացնում է, որ Իրանի թիրախներին «հաջող հարված է հասցվել», տեղեկացրել է Times of Israel-ը։
«Պատասխան հարվածն ավարտվել է, եւ նրա նպատակն իրականացվել է»,- հայտնել է Հագարին մամուլի ասուլիսում։
ՑԱԽԱԼ-ը հարվածել է հրթիռների արտադրման իրանական օբյեկտներին եւ հակաօդային պաշտպանության մարտկոցներին՝ «ի պատասխան Իսրայելի դեմ Իրանի գրոհի այս ամսվա սկզբին եւ ապրիլին»։
«Այժմ Իսրայելը գործողությունների ավելի մեծ ազատություն ունի նաեւ Իրանում։ Իրանը երկու անգամ հարվածել է Իսրայելին… եւ վճարել է դրա համար։ Մենք կենտրոնացել ենք Գազայում եւ Լիբանանում պատերազմի թիրախների դեմ։ Հենց Իրանն է շարունակում համառել, որ տարածաշրջանային թեժացում լինի»,- նշել է Հագարին։
Նրա խոսքով՝ թիրախներն Իրանում ընտրվել են «թիրախների լայն ցուցակից»։
«Մենք կիմանանք, թե ինչպես ընտրենք լրացուցիչ թիրախները եւ հարվածենք դրանց, եթե կարիք լինի։ Սա հստակ ազդանշան է. ով սպառնա Իսրայելին, կվճարի բարձր գին»,- ավելացրել է նա։
Իրանի հետագա քայլերին Իսրայելը «պատասխան կտա»։
«Եթե Իրանի ռեժիմը սխալ գործի եւ նոր թեժացում սկսի, մենք պարտավոր ենք արձագանքել։ Այսօր մենք ցուցադրեցինք, որ ինչպես հնարավորություն, այնպես էլ վճռական գործելու վճռականություն ունենք, եւ մենք պատրաստ ենք ինչպես հարձակման, այնպես էլ պաշտպանության»,- ավելացրել է նա։
Ավելի վաղ իրանական Mehr գործակալությունը տեղեկացրել էր, որ իսրայելական ուժերը հարվածել են ռազմական օբյեկտներին Իրանում՝ նրանց «սահմանափակ վնաս» պատճառելով։
Իրանի ՀՕՊ ուժերի հայտարարության համաձայն՝ նրանց հաջողվել է հաջողությամբ հետ մղել իսրայելական հարվածները։
«Նա [Իսրայելը] հարձակվել է Թեհրանի, Խուզեստանի և Իլամի նահանգների ռազմական կենտրոնների վրա, և չնայած երկրի հակաօդային պաշտպանության ինտեգրված համակարգը հաջողությամբ կալանել և հետ է մղել այդ ագրեսիվ գործողությունները, սահմանափակ վնաս է հասցվել», – ասվում է զեկույցում:
Իրանական իրազեկ աղբյուրները հերքել են Իսրայելի հայտարարությունն այն մասին, որ հարվածներ է հասցրել Իրանի 20 կետերին։
Իսրայելական բանակի այն պնդումը, թե 20 թիրախ է խոցել Իրանի ողջ տարածքում, չի համապատասխանում իրականությանը, Tasnim-ին հայտնել է աղբյուրը՝ նշելով, որ հակառակորդի կողմից թիրախավորված թիրախների թիվը զգալիորեն ավելի քիչ է, քան նշված է:
Աղբյուրը հավելում է, որ իսրայելական ուժերի գործողություններն իրականացվել են Իրանի սահմանից դուրս և սահմանափակ վնասներ են պատճառել։ Աղբյուրը նաև հաստատել է տեղեկությունը, որ Թեհրանում գտնվող Իսլամական հեղափոխության պահապանների կորպուսի ռազմական կենտրոններից ոչ մեկը հարձակման չի ենթարկվել։
«Տեղեկություններն այն մասին, որ 100 իսրայելական ռազմական ինքնաթիռներ են մասնակցել հարվածին, նույնպես լիովին կեղծ են, քանի որ Իսրայելը փորձում է ուռճացնել իր թույլ հարձակումը», – հավելել է աղբյուրը։
Ուրբաթ, պատասխան հարվածից առաջ, Իսրայելն Իրանին տեղեկություն է ուղարկել պատասխան հարված չհասցնելու նախազգուշացմամբ, տեղեկացրել է Axios-ը՝ հղում կատարելով հարցին ծանոթ աղբյուրներին։
Նրանց խոսքով՝ Իսրայելի ուղերձը հանձնվել է իրանցիներին երրորդ անձանց միջոցով։
«Իսրայելցիները նախապես հասկացրել են իրանցիներին, թե ինչի դեմ են պատրաստվում հարձակվել եւ ինչի դեմ՝ ոչ»,- ասել է աղբյուրներից մեկը։
Երկու այլ աղբյուր տեղեկացրել է, որ Իսրայելը նախազգուշացրել է իրանցիներին չարձագանքել այս հարձակմանը եւ ընդգծել է, որ եթե Իրանը պատասխան միջոցներ ձեռնարկի, Իսրայելն ավելի լուրջ հարված կհասցնի, մանավանդ եթե սպանվեն կամ վիրավորվեն իսրայելցի քաղաքացիական անձինք։ Իսրայելի վարչապետի գրասենյակը չի պատասխանել մեկնաբանությունների խնդրանքին։ Իրանը հայտնել է, որ չի ցանկանում խոշորածավալ պատերազմ Իսրայելի հետ, բայց պատասխան միջոցներ կձեռնարկի հարձակման դեպքում։
Աղբյուրների խոսքով՝ Իսրայելի հայտարարությունը հարվածների փոխանակումը սահմանափակելու փորձ էր։
Axios-ի աղբյուրների խոսքով՝ տեղեկությունը հանձնողներից մեկը Նիդեռլանդների արտգործնախարար Կասպար Վելդկամպն էր։
«Ես խոսել եմ Իրանի արտաքին գործերի նախարարի հետ աճող լարվածության մասին։ Ես զսպվածության կոչ եմ արել։ Բոլոր կողմերը պետք է աշխատեն հետագա թեժացումը կանխելու ուղղությամբ»,- գրել է Վելդկամպը X սոցցանցում իսրայելական գրոհից մի քանի ժամ առաջ։
ԱՄՆ պաշտոնատար անձինք հայտել են, որ սպասում են, որ Իրանը կպատասխանի իսրայելական գրոհին առաջիկա օրերին, բայց սահմանափակ ձեւով, ինչը թույլ կտա Իսրայելին դադարեցնել «ակն ընդ ական» ցիկլը։
«Մեր նպատակը դիվանագիտական ջանքերն արագացնելն է եւ լարվածությունը թուլացնելը մերձավորարեւելյան տարածաշրջանում։ Մենք Իրանին կոչ ենք անում դադարեցնել հարձակումներն Իսրայելի դեմ, որպեսզի այդ ցիկլը ավարտվի առանց հետագա թեժացման»,- ասել է Ազգային անվտանգության խորհրդի ներկայացուցիչ Շոն Սավեթը։
Սպասվում է, որ Իսրայելի հարվածներն Իրանին կդառնան վերջինը երկու երկրների միջեւ ռազմական գործողություններում, այսօր հայտնել է ԱՄՆ նախագահի վարչակազմի բարձրաստիճան պաշտոնյան, տեղեկացրել է NBC News-ը։
Պաշտոնական աղբյուրի խոսքով՝ սա «ԱՄՆ հաստատուն կարծիքն է», եւ դրա մասին «տեղեկացվել է տարածաշրջանի մեր բոլոր գործընկերներին»։
Պաշտոնյան նշել է, որ Բայդենը եւ նրա անվտանգության թիմը «աշխատել են իսրայելցիների հետ, որպեսզի վերջինը համամասնական պատասխան միջոցներ ընդունի ցածր ռիսկով»։
Պաշտոնյայի խոսքով՝ Իսրայելի վարչապետ Բենիամին Նեթանյահուի հետ հեռախոսազրույցում Բայդենն անցած շաբաթ հայտնել է, որ ցանկացած գրոհ պետք է ուղղված լինի Իսրայելի դեմ հետագա հարձակումների կանխմանը եւ հետագա թեժացման նվազեցմանը։
«Մենք չենք ցանկանում, որ դա տեղի ունենա»,- ասել է պաշտոնյան։
Աղբյուրն ընդգծել է, որ Միացյալ Նահանգները անմիջական մասնակցություն չի ունեցել իսրայելական հարվածներին, որոնք հասցվել են «մի քանի ալիքներով»։
Բայց եթե Իրանը ուղիղ հարված հասցնի Իսրայելին, ԱՄՆ-ը խոստացել է աջակցել իր դաշնակցին, ասել է նա։
«Եթե Իրանը որոշի պատասխանել, մենք լրիվ պատրաստ ենք նորից պաշտպանվել ցանկացած հարձակումից»,- ավելացրել է աղբյուրը։
