ԱՀ պետնախարար Գուրգեն Ներսիսյանն այսօր ԱՀ կառավարության մի շարք պատասխանատուների հետ քննարկվել է Արցախի ամբողջական շրջափակման հետևանքով ստեղծված իրավիճակը և մեր առաջիկա անելիքները: Այս մասին նա հայտնել է իր ֆեյսբուքյան էջում:

«Քննարկման արդյունքում ընդունվել են հետևյալ որոշումները.

1. Հաջորդ շաբաթվա ընթացքում Ստեփանակերտ քաղաքում և շրջկենտրոններում կսահմանվեն մինչև 18 տարեկան երեխաներ ունեցող ընտանիքներին շաքարավազ և ձեթ իրացնելու կետեր և կկազմակերպվի իրացում, իսկ գյուղական համայնքներին կփոխանցվի տեղական ինքնակառավարման մարմինների միջոցով.
2. Հաջորդ շաբաթվանից սահմանափակումներ են մտցվելու հանրային սննդի օբյեկտների գործունեության մեջ.
3. Միջոցներ են ձեռարկվելու հասարակական տրանսպորտը բեռնաթափելու ուղղությամբ՝ պետական համակարգում աշխատողներին հնարավորություն ընձեռելով աշխատանքն իրականացնել տնից՝ հեռավար կարգով.Հիշեցման կարգով նշենք, որ սոցիալական որոշ խմբերի ԱՀ սոցիալական զարգացման և միգրացիայի նախարարությունը աջակցության կարգով արդեն տրամադրել է տարբեր տեսակի սննդամթեր»:

Ընթացիկ տարում Արցախցիները ոչ միայն ստիպված են դիմակայել շրջափակմանը, այլև պարբերաբար բախվում են վնասաբեր բնական աղետների հետ: Իր ֆեյսբուքյան էջում գրել է Արցախի պետնախարար Գուրգեն Ներսիսյանը։

« Արցախի մի շարք համայնքներ արդեն մի քանի անգամ կարկտահարվել են, իսկ երեկ տեղացած կարկուտն ու սելավը նորից մեծ վնասներ է պատճառել Ասկերանի ու Մարտակերտի շրջանի մի շարք համայնքների, վնասվել են ցանքատարածություններ, մարդկանց բնակելի տներ:

Արցախի Հանրապետության գյուղատնտեսության և քաղաքաշինության նախարարությունների մասնագետները արդեն սկսել են վնասի հաշվարկման և հնարավորության սահմաններում՝ պատճառված վնասները վերականգնելու աշխատանքները:

Ամբողջությամբ վնասվել է Մարտակերտի շրջանի Գառնաքար համայնքի կամուրջը, սակայն այլընտրանքային՝ սահմանափակ հնարավորություն ենթադրող լուծումն արդեն գտնվել է, հիշյալ համայնք է ուղարկվել անհրաժեշտ քանակի ալյուր, շուտով կուղարկվի նաև դեղորայք:

Ավելի քան 200 օր է Արցախի Հանրապետությունը անասելի պայքարի մեջ է, Արցախի ժողովուրդը բացահայտորեն, բազմաթիվ դիտորդների աչքի առաջ ենթարկվում է զրկանքների ու տառապանքների, արցախցուն փորձ է արվում հարկադրանքի միջոցով ստիպել հրաժարվել իր ինքնությունից, ուրանալ իր ծննդավայրը, լեզուն, հավատքը, բայց իրադարձությունները ցույց են տալիս, որ բոլոր քայլերն անցնում են ապարդյուն:

Բայց այս ամենը պետք է ավարտ ունենա, Արցախի ժողովրդի համբերությունն անսպառ չէ»,- գրել է Գուրգեն Ներսիսյանը:

Արցախի շրջափակման 200-րդ օրվա կապակցությամբ Ադրբեջանական ԽՍՀ-ից, Նախիջևանից և Արցախի Հանրապետությունից հայ փախստականները և բռնի տեղահանվածները կոչ-ահազանգ են տարածել: Ինչպես տեղեկացնում է «Արմենպրես»-ը, փախստականների և բռնի տեղահանվածների հայտարարության մեջ նշված է, որ հունիսի 30-ին լրանում է Ադրբեջանի կողմից Արցախի շրջափակման, 120 հազար արցախցիների պատանդառման, առանց տարրական կենսապայմանների և էթնիկ զտման սպառնալիքի ներքո նրանց գոյատևման 200-րդ օրը:

«Ադրբեջանը ոչ միայն արհամարհում է Արցախի ապաշրջափակման վերաբերյալ միջազգային կառույցների կոչերը, այդ թվում՝ ՄԱԿ-ի արդարադատության միջազգային դատարանի կողմից ս.թ. փետրվարի 22-ի իրավաբանորեն պարտավորեցնող որոշումը, համաձայն որի Ադրբեջանը պետք է վերականգնի Լաչինի միջանցքով անխափան տեղաշարժը, այլև շարունակում է Արցախի խաղաղ բնակչության ահաբեկման պրակտիկան. ասվածի վառ օրինակն է երկու օր առաջ Արցախի Մարտունու և Մարտակերտի ուղղությամբ հրետանային կրակ բացելու հետևանքով հայկական կողմի 4 զոհը:

Միևնույն ժամանակ, Ադրբեջանը կոպտորեն խախտում է նաև իր իսկ կողմից ստանձնած պարտավորությունները, այդ թվում՝ 2020 թվականի նոյեմբերի 9-ի եռակողմ հայտարարության 7-րդ կետը, որի համաձայն՝ տեղահանված անձինք և փախստականները վերադառնում են Արցախի տարածք և հարակից շրջաններ՝ ՄԱԿ-ի վերահսկողության ներքո:

Ինչպես տասնամյակներ առաջ, այնպես էլ հիմա, Ադրբեջանն ուժի սպառնալիքով և կիրառմամբ շարունակում է հայաթափման հետևողական քաղաքականությունը: 1987-1992թթ. Ադրբեջանական ԽՍՀ-ում, ապա Ադրբեջանի Հանրապետության կողմից հայության դեմ կատարված ոճրագործությունների, ցեղասպան գործողությունների, պետականորեն խրախուսվող ջարդերի պատճառով նաև հարյուր հազարավոր հայեր ունեզրկվեցին, դարձան փախստական: Այդ քաղաքականության հետևանքով երբեմնի հայաբնակ, սակայն հայաթափված Նախիջևանում միտումնավոր և հանցավոր կերպով ոչնչացվեց հայկական մշակութային ժառանգությունը: Նախիջևանի օրինակով այժմ սպառնում է նաև Արցախին:

Ադրբեջանը, օգտվելով միջազգային հանրության կողմից հայության դեմ իրականացրած իր ոճրագործությունների չդատապարտման հանգամանքից և իրավական քննության բացակայության փաստից, ավելի մեծ թափով է լծվել հայատյաց, հայահալած քաղաքականության իրականացմանը: Ներկայումս իրավիճակը ծայրահեղ ծանր է»,- ասված է հայտարարության մեջ։

Ելնելով վերոգրյալից՝ միջազգային հանրությունից, միջազգային կազմակերպություններից և գործընկեր պետություններից փախստականները և բռնի տեղահանվածները պահանջում են.

Մշակել և ձեռնարկել գործուն քայլեր՝ ստիպելու Ադրբեջանին ապաշրջափակել Արցախն ու դադարեցնել հումանիտար աղետը և իրագործել ՄԱԿ-ի արդարադատության միջազգային դատարանի կողմից կայացրած որոշումը,

Աջակցել բոլոր հայ փախստականների ու բռնի տեղահանվածների արժանապատիվ և ապահով ինքնակամ վերադարձի իրավունքի իրացմանը, մշակել վերադարձի և այնտեղ նրանց ֆիզիկական, քաղաքական և քաղաքացիական, այդ թվում նրանց ինքնության անվտանգությունը բոլոր երաշխիքներով ապահովելու մեխանիզմներ,

Ապահովել Ադրբեջանի վերահսկողության տակ անցած շրջանների հայկական մշակութային ժառանգության կոթողների անվտանգ և անվնաս գոյությունը,

Ստեղծել անհրաժեշտ պայմաններ՝ փախստականների և նրանց ժառանգների համար կորցրած ունեցվածքի դիմաց Ադրբեջանի կողմից փոխհատուցում տրամադրելու համար և պարտադրել Ադրբեջանին կատարել իր այդ պարտավորությունը,

Քաղաքական գործընթացներին զուգահեռ նախանձախնդրորեն հետամուտ լինել մարդասիրական խնդիրների արագ և անխոչընդոտ կարգավորմանը։

Եվրամիության պաշտոնյաները պետք է գիտակցեն, թե ինչ սպառնալիք է ներկայացնում բռնապետական Ադրբեջանին աջակցելը, «Թվիթեր»-ի իր էջում գրել է Արցախի պետնախարարի խորհրդական Արտակ Բեգլարյանը՝ անդրադառնալով ԵՄ-ում Բաքվի դեսպան Վագիֆ Սադիկովի կողմից Եվրախորհրդարանի անդամներին ուղղված ակնհայտ սպառնալիքին։

«Ադրբեջանի դեսպան Վագիֆ Սադիկովի կողմից Եվրախորհրդարանի անդամներին ակնհայտ սպառնալիքը միայն սկիզբն է։ Նրան անցանկալի անձ հայտարարելը տվյալ դեպքում նվազագույնն է, ինչ կարելի է անել»,- գրել է նա։

Վարչապետ Նիկոլ Փաշինյանի գլխավորությամբ տեղի է ունեցել Անվտանգության խորհրդի հերթական նիստը:

Ինչպես «Արմենպրես»-ին տեղեկացրին ՀՀ վարչապետի աշխատակազմից, բացի ԱԽ անդամներից, նիստին մասնակցել են Հանրապետության նախագահ Վահագն Խաչատուրյանը, Ազգային ժողովի նախագահ Ալեն Սիմոնյանը և Պաշտպանության նախարարի տեղակալ Կարեն Բրուտյանը:

Նշվում է, որ քննարկվել են օրակարգային տարբեր հարցեր:

Հունիսի 29-ի երեկոյան Ստեփանակերտում Միջանցքի ապաշրջափակման ժողովրդական շարժման շտաբի նախաձեռնող խումբը ստացել է համախոհների հավանությունը Արցախում ռուսական խաղաղապահ զորախմբի հրամանատարության հետ փակ հանդիպման համար։

Նախաձեռնող խմբի անդամները հայտնել են, որ այն բանից հետո, երբ հունիսի 26-ին Արցախի խորհրդարանը մերժել է նամակում նշված պահանջների կատարումը, Շարժումը դիմել է խաղաղապահներին՝ համաձայնություն ստանալով հանդիպման համար, բայց պայմանով, որ հանդիպումը կլինի փակ։ «Արցախի ապաշրջափակումը միակ բանն է, որը բոլորիս պետք է անհանգստացնի, և բոլոր ուժերը պետք է ուղղվեն դրան։ Հանդիպումը գեներալ Լենցովի հետ անհրաժեշտ է։ Մենք չունենք անձնական նպատակներ և հավակնություններ։ Հանդիպման մասին հանրությունը կտեղեկացվի բոլոր մանրամասներով»,- ներկաներին վստահեցրեց «Արցախյան ակցենտ» բլոգի հեղինակ Դավիթ Վանյանը և հավելեց, որ հանդիպումը պետք է կայանա մոտ օրերս։
Շտաբում հավաքվածները համակարծիք էին, որ Շարժման անդամները հանդիպեն խաղաղապահների հրամանատարությանը։

Հիշեցնենք, որ «Հանուն միջանցքի շրջափակման ժողովրդական շարժման» շտաբը Արցախի Ազգային ժողովից պահանջել է դիմել ռուս խաղաղապահներին՝ պահանջելով անհապաղ բացել Քաշաթաղի (Լաչին) միջանցքը՝ 2020 թվականի նոյեմբերի 9-ի եռակողմ հայտարարության համաձայն։ Եթե ​​միջանցքը չբացվի, ապա Ազգային ժողովը պետք է հրապարակայնորեն հայտարարի, որ ռուս խաղաղապահները չեն կարողանում կատարել իրենց պարտավորությունները։ Դրանից հետո Արցախի պատգամավորները պետք է դիմեն ԵԱՀԿ-ին և Ֆրանսիայի Սենատին՝ միջազգային հավելյալ խաղաղապահ ուժեր ներգրավելու համար ՄԱԿ-ի բոլոր հնարավոր մեխանիզմները կիրառելու խնդրանքով»։