«Ես կխոսեմ ռուսերեն, որպեսզի թշնամիները հասկանան, թե ինչի մասին է խոսքը»,- ադրբեջանական լրատվամիջոցներին ուղղված իր կոչը այսպես սկսեց Արցախի Հեղափոխական կուսակցության նախագահ Արթուր Օսիպյանը։
«Հայկական ալիքներից մեկին տված իմ հարցազրույցից մի արտահայտություն են պոկել և իրենց «սոուսի» տակ ներկայացրել։ Այս մասին գրառում էի տեղադրել իմ ֆեյսբուքյան էջում, սակայն այն ջնջվել է, և պարզ է, թե ում կողմից։ Այդ իսկ պատճառով ես տեսաուղերձ եմ պատրաստել։ Փաստն այն է, որ Ալիևի նույն մեդիա ռեսուրսները ամիսներ առաջ հրապարակել էին նյութեր, որոնցում ցույց էին տալիս, թե ինչպես են՝ գրավելով Քաշաթաղի (Լաչին) միջանցքը Լեռնային Ղարաբաղի հայերին սովի մատնելու և ստիպելու ընդունել Բաքվի բոլոր պայմանները։ Ուստի դիմում եմ Ադրբեջանի իշխանություններին և նրանց լրատվամիջոցներին. ձեր ցեղասպան քաղաքականությունը, հայատյացությունը հայտնի է ողջ աշխարհին։ Այս քաղաքականության մասին գրում են հայտնի միջազգային փորձագետներ և իրավաբաններ։ Արյունարբու էությունը, որը դուք ցույց եք տալիս, կշրջվի ձեր դեմ: Որովհետև ողջ քաղաքակիրթ աշխարհը տեսել է ձեր քաղաքականությունը, և դուք կպատժվեք։ Ձեզ կպատժեն այն երեխաները, որոնցից խլում եք մանկությունն ու կյանքի իրավունքը։ Իսկ իմ կոնտեքստից հանված արտահայտությունները, թե ԼՂ-ում իրավիճակը կրիտիկական չէ, սովից մահվան դեպքեր չկան, ոչնչի չեն հանգեցնի»։
Օսիպյանը վստահ է, որ «Ադրբեջանի ոռնոցն ու հիստերիան՝ խաղաղ ակցիայից վախից է, խաղաղ երթից դեպի Հաքարի կամուրջ՝ Քաշաթաղի միջանցքը ապաշրջափակելու համար։ Երթը նախապատրաստվում է Ժողովրդական շարժման շտաբի կողմից՝ ընդ որում, 5 կմ լայնության ապահովմամբ, համաձայն 2020 թվականի նոյեմբերի 9-ի պայմանագրի։
«Դուք ոռնոց եք բարձրացրել՝ խառնելով ռուսներին (ռուս խաղաղապահներին), ասելով, իբր ռուսների հետ միասին հարձակում ենք նախատեսում այսպես կոչվածի անցակետի վրա։ Իբր սա զինված գործողություն է, եւ մենք փորձում ենք զորքերի ռոտացիա անել և այլն: Ինչ ասես չմտածեծիք, փորձելով վախ բռնել մեզ վրա, որպեսզի մենք հրաժարվենք մեր նպատակներից: Բայց ձեզ չի հաջողվի։ Ակցիայի կազմակերպումն ընթացքի մեջ է։ Եվ ճիշտ ժամանակին մենք կլինենք ճիշտ տեղում, կբարձրացնենք մեր հարցերը և կհասնենք արդարության։ Որովհետև ողջ քաղաքակիրթ աշխարհը ուշադրության կենտրոնում է պահում ԼՂ շրջափակումը»։
Նա հայտարարեց, որ «Արցախը հնարավոր չէ ծնկի բերել, դուք (ադրբեջանական կողմը) չեք կարողանա մեզ սովամահ անել»։
«Չնայած գազը, հոսանքը անջատեցիք, մենք դիմանում ենք ու պայքարելու ենք։ Եվ մենք ամբողջ աշխարհին ցույց կտանք, թե ինչպես է Ղարաբաղի ժողովուրդը պայքարում հանուն իր Հայրենիքի, հանուն արդարության և ինքնորոշման»։
