«Ընդունելով այն կարևոր երկարաժամկետ միջնորդական դերը, որը Միացյալ Նահանգները, որպես ԵԱՀԿ Մինսկի խմբի համանախագահ, խաղացել և շարունակում է խաղալ ադրբեջանա-ղարաբաղյան հակամարտության կարգավորման խաղաղ գործընթացում, միևնույն ժամանակ մենք կարծում ենք, որ միջնորդների մոտեցումները չպետք է կանխորոշեն բանակցությունների արդյունքը»,-ասել է Արցախի ԱԳՆ-ն՝ անդրադառնալով Հայաստանում ԱՄՆ դեսպան Քրիստինա Քուինի հարցազրույցին։

Հիշեցնենք, որ պատասխանելով հայ հաղորդավարուհու հարցին, թե «Հայաստանը ճանաչեց Ղարաբաղը որպես Ադրբեջանի մաս, հնարավո՞ր եք համարում, որ հայերը բնակվեն Ղարաբաղում», դեսպանը պատասխանել է, որ հավատում է նման հնարավորությանը։

Հակամարտության կարգավորումը կանխորոշող մոտեցումների անթույլատրելիության մասին Արցախի ԱԳՆ հայտարարությունից հետո դեսպան Քվինը հանդես է եկել նոր հայտարարությամբ. «Ուղիղ երկխոսությունը խնդիրների լուծման և տեւական ու արժանապատիվ խաղաղության հասնելու միջոց է։ ԱՄՆ-ը չի կանխորոշում Լեռնային Ղարաբաղի ապագայի շուրջ բանակցությունների արդյունքը. Միացյալ Նահանգները սատարում է համաձայնագիրը, որն ամուր, կայուն խաղաղության հիմք է ստեղծում: Հայ-ադրբեջանական հակամարտության հիմքում ընկած է Լեռնային Ղարաբաղի ժողովրդի իրավունքների և անվտանգության խնդիրը։ Վերջիվերջո, չափազանց երկար ձգձգված և բազմաթիվ կյանքեր արժեցած այս հակամարտության տեւական լուծում ապահովելու միակ ճանապարհը Լեռնային Ղարաբաղի ժողովրդի իրավունքների պաշտպանությունն ու իրենց տներում անվտանգ ապրելու ապահովելն է», ասված է հայտարարության մեջ։ Եւ ոչ մի հիշատակում Բաքվի մասին։

Փաստորեն, դեսպանը լսել է Արցախի ԱԳՆ հայտարարությունը։ Արցախի և ԱՄՆ-ի միջև կապի ուղիները բաց են, և Ստեփանակերտը կարող է իր ուղերձներն ուղղակիորեն Վաշինգտոնին հղել։ ԱՄՆ-ը միշտ բաց է եղել Ստեփանակերտի համար. հիշվում է՝ Կոնգրեսի ամբիոնից ժամանակին ելույթ է ունեցավ ներկայիս նախագահ Արայիկ Հարությունյանը։ Արցախի պատվիրակությունը ջերմ ընդունելության է արժանացել նաեւ Ֆրանսիայում, որտեղ արցախցի պաշտոնյաները փչացրել են ամեն ինչ՝ պահանջելով ՄԱԿ-ի մանդատ… ռուս խաղաղապահների համար։

Ռուսաստանի պետական ​​մարմիններում Արցախի ներկայացուցիչներին ընդունել են միայն հատուկ ծառայությունների բաժնւ պոտի և Ռեգնում գործակալության մակարդակով։ Հիշեցնենք, որ երեկ ՌԴ ԱԳՆ ներկայացուցիչը, որին խնդրել են մեկնաբանել Արայիկ Հարությունյանի խոսքերը, թե Ռուսաստանի դրդմամբ Քաշաթաղի երեք բնակավայր է հանձնվել, ասել էր, որ նման անունով եւ պաշտոնով մարդ չի ճանաչում։

Արցախի իշխանությունները չեզոքացնում են այն հնարավորությունները, որոնք կարող են բացվել միջազգային ալիքներից օգտվելիս՝ համառորեն թաքնվելով ռուս գեներալների մունդիրների հետևում։ Արցախի ԱԳՆ-ն, ամերիկացի դեսպանի անհաջող դիրքորոշման մասին գրագետ հայտարարությունից հետո, կարող է «գրագետ կերպով կշտամբել» Մարիա Զախարովային՝ Մակրոնի մասին հայտարարությունների համար։ Հիշեցնենք, որ Զախարովան Ֆրանսիային «մեղադրել է» Ալիևին ագրեսոր ճանաչելու և պատժամիջոցներ կիրառելու կոչերի մեջ։ Արցախի ԱԳՆ-ն կարող է առարկել Զախարովային։

Step1.am

«Հանուն միջանցքի ապաշրջափակման ժողովրդական շարժման» ներկայացուցիչ Դավիթ Վանյանը եթեր է դուրս եկել և խոսել Արցախում ռուսական խաղաղապահ զորախմբի հրամանատար գեներալ Լենցովի հետ հանդիպման մասին։ Նրա խոսքով, փակ ձեւաչափով հանդիպումը տեւել է ավելի քան 2 ժամ։

Դավիթ Վանյանի խոսքով, Շարժման անդամները հստակ բարձրացրել են իրենց հարցերը, սակայն հստակ պատասխաններ չեն ստացել.

«Մենք ասացինք, որ մեր հարաբերություններն ու գործողությունները պետք է հիմնված լինեն 2020 թվականի նոյեմբերի 9-ի հայտարարության վրա, և հարցրինք, թե ինչու խաղաղապահները չեն կատարում իրենց պարտավորությունները։ Երկար խոսեցինք այս մասին, հետո մեզ ասացին, որ խաղաղապահներն էլ ունեն վերադաս , ում հրահանգները կատարում են։ Հիմա վերադասն իբր այս հարցով զբաղվում է, շուտով հայտարարություններ կլինեն, հույս ունենք, որ արդյունք կլինի»,- ասաց Վանյանը։

Շարժման ներկայացուցիչներն էլ ասացին, որ չեն պատրաստվում ատելության սերմանել ռուսների նկատմամբ։ Ավելին, նրանք օգնություն են առաջարկել, սակայն պատասխան չեն ստացել։

«Եթե չեք կարողանում կատարել ձեր պարտավորությունները, ապա անկեղծ խոսեք այդ մասին»,- ասացին արցախյան հասարակական գործիչները։ Ինչին ստացել են պատասխան, որ խաղաղապահները կատարում են իրենց պարտավորությունները։ «Մենք դա հերքող մի շարք կետեր ենք ներկայացրել»,- ասաց Դավիթ Վանյանը։

Խաղաղապահների հրամանատարությունը խորհուրդ է տվել դիմել սեփական իշխանությունների հետ։ «Մենք ասացինք, որ ոչ մեր իշխանությունները, ոչ Երևանի իշխանությունները պատերազմից հետո պարտավորություն չեն վերցրել դառնալ կանանց ու երեխաների վերադարձի երաշխավորը, նախագահ Պուտինն էր, որ կոչ արեց՝ վերադարձե՛ք, ապահով կապրե՛ք։ Մարդիկ նրան հավատացին։ Ինչ է կատարվում հիմա․ Պուտինն իր խոսքի տերը չի՞, թե՞ խաղաղապահները չեն կատարում իրենց պարտավորությունները»,- ասաց Դավիթ Վանյանը։

Նա նաև մեջբերեց մի հետաքրքիր դրվագ. «Խաղաղապահների հրամանատարությունն ասում է, որ մենք խնդիր չունենք «ձեր խորհրդարանի» հետ»,- ասաց Վանյանը։ Չունեք, քանի որ պատգամավորների մեծամասնությունն համաձայնվում են այն ամենի հետ, ինչ դուք ասում եք, իսկ մենք միայն մեր շահերն ենք պաշտպանում, պատասխանել են Շարժման ներկայացուցիչները։

«Պետք է սկսել կոնկրետ քայլեր անել, մի երկու օր սպասենք, տեսնենք, թե ինչ հայտարարություններ են դրանք, և քայլերը կխստացնենք։ Մեր գործողություններն արդեն արդյունք են տալիս, և նրանք, ովքեր ասում են, թե ամեն ինչ մեր տեղ որոշված ​​է, ու պայքարելու կարիք չկա, ապացույցներ են ստացել, որ այդպես չէ։ Մինչև մեր հարցերը չլուծենք, գնալու ենք մինչև վերջ»,- ասաց նա։

«Արդեն մի քանի ամիս է, ինչ Ադրբեջանը լայնածավալ հակաքարոզչություն է իրականացնում Ֆրանսիայի դեմ, որը պաշտոնապես և հրապարակայնորեն արտահայտում է իր հասցեական գնահատականներն ու մտահոգությունները Լեռնային Ղարաբաղի հայ բնակչության նկատմամբ Ադրբեջանի անօրինական գործողությունների վերաբերյալ»,- գրել է Նիկոլ Փաշինյանը։

Մինչ այդ կառավարության նիստում նա ասել էր, որ Հայաստանը երախտապարտ է Ֆրանսիային մարդասիրական գործունեության համար, սակայն չասաց, թե Հայաստանը շնորհակա՞լ է արդյոք Ֆրանսիայի քաղաքական քայլերի համար։ Երևանը գրեթե աննկատ ողջունեց Ֆրանսիայի քաղաքական նախաձեռնությունները, որոնք ուղղված են ահաբեկչական պատերազմի հետևանքով ստեղծված ստատուս քվոյի ճանաչումը կանխելուն, հարցը ԵԱՀԿ-ի, ՄԱԿ-ի շրջանակներում քննարկելուն և բազմազգ զորքեր Արցախ ուղարկելուն։ Բայց Հայաստանի իշխանությունները չաջակցեցին Մակրոնին այս նախաձեռնություններում, ինչի մսսին Ֆրանսիայի նախագահը հայտարարեց միանգամայն անկեղծ։

Փաշինյանը խորամանկորեն գրում է, որ Բաքուն է հակաֆրանսիական արշավ իրականացնում, թեև իրականում դա Բաքվի և Մոսկվայի հերթական համատեղ արշավն է։ Երեկ Ռուսաստանի արտգործնախարարության խոսնակ Մարիա Զախարովան հերթական անգամ “թռեց” Ֆրանսիայի դեմքին։ Բայց՝ «կշտամբելով» Ֆրանսիային, նա փաստորեն թցարկեց հայ ժողովրդի համար արած Փարիզի բոլոր քայլերը, որոնց ֆոնի վրա ռուսական «միջնորդությունն» էլ ավելի մռայլ է թվում։

«Մենք վաղուց պատրանքներ չենք ունեցել այն մասին, որ Ֆրանսիան կարող է դրական ներդրում ունենալ Լեռնային Ղարաբաղի բարդ խնդիրների լուծման գործում. ԵԱՀԿ Մինսկի խմբի աշխատանքի սաբոտաժ, իրականում փլուզում, այդ թվում Փարիզի ջանքերով, 2022թ., անցյալ տարվա աշնանը Ֆրանսիայի Ազգային ժողովի և Սենատի կողմից ընդունված բանաձև, որը դատապարտում էր, ինչպես իրենք էին գրում, Ադրբեջանի ագրեսիան և պատժամիջոցներ պահանջում հենց այդ երկրի և նրա պաշտոնյաների դեմ, Փարիզի կողմից Հակաստանում քաղաքացիական առաքելություն տեղակայելու նախաձեռնությունը՝ կասկածելի մանդատով և առանց Ադրբեջանի կարծիքը հաշվի առնելու»,- թվարկեց Զախարովան։

Այսպիսով, ՌԴ ԱԳՆ-ն բացահայտ կշտամբում է Ֆրանսիային՝ Ալիևին ագրեսիայի համար դատապարտելու համար (ավելին, համաձայն չէ «ագրեսիա» հասկացության հետ)։

Փաշինյանը չի խոսում այն ​​մասին, թե ինչու է Մոսկվան միացել հակաֆրանսիական արշավին. Ստեփանակերտը, որը դեռևս նամակներ է ուղարկում Պուտինին, եւս այս մասին չի խոսում, թեև արդեն ընդունում է, որ ռուսների դրդմամբ են հանձնվել Քաշաթաղի շրջանի երեք բնակավայրերը։ Ի դեպ, Զախարովան երեկ ասել է, որ չգիտի, թե ով է Արայիկ Հարությունյանը եւ չի մեկնաբանի Քաշաթաղի շրջանի մասին նրա հայտարարությունները։ Սա, ըստ երեւույթին, նշանակում է նաեւ, որ Պուտինին ուղղված Հարությունյանի նամակին էլ պատասխան չի լինելու։ Մյուս կողմից, Ռուսաստանը չի ճանաչում Ալիևի ագրեսիան Արցախի դեմ՝ ի տարբերություն Ֆրանսիայի, եւ պատահական չէ, որ Պուտինը հենց Ալիևի հետ է ռազմավարական համագործակցության համաձայնագիր ստորագրել նախքան Ուկրաինա ներխուժելը։