Երևանում ՄԱԿ-ի գրասենյակի դիմաց ակցիա է կազմակերպվել՝ ի աջակցություն Արցախի։ Ինչպես հաղորդում է «Արմենպրես»-ը, Արցախի առողջապահության նախարարությանը կից մասնագիտական խորհրդի անդամ, բժիշկ Արամայիս Գալումյանը իր ելույթում նշեց, որ այն, ինչ այսօր կատարվում է Արցախի դեմ, ահաբեկչություն է։ «Դա ահաբեկչություն է մի պետության կողմից, որը ոչ թե մասնավոր ահաբեկչական խմբավորում է, այլ ահաբեկիչ պետություն է։ Չտեսնված մի երևույթ է, երբ կարելի է 120 հազար մարդու շրջափակել, զրկել տարրական սննդի հնարավորությունից, առողջապական ծառայություններ ստանալու հնարավորությունից։ Սա ի՞նչ է, եթե ոչ ահաբեկչություն։ Այստեղ պատասխանատու են բոլոր միջազգային կազմակերպությունները, բոլոր մեծ պետությունները, որոնք աշխարհում կարգեր են հաստատում։ Մենք պահանջում ենք Արցախի բնակչությանն ապահովել սննդով, առողջապահական ծառայություններով, ճանապարհով և ամեն ինչով»,- հայտարարեց  Արամայիս Գալումյանը։

Ադրբեջանական ԽՍՀ-ից փախստականների համագումարի համակարգող Մարիամ Ավագյանը իր խոսքում նշեց, որ հայությունը չի կորցրել իր հույսը, որ փափուկ ուժով էլ կարող է Արցախը փրկել։ «ՄԱԿ-ի երևանյան գրասենյակը պարբերաբար ինձ անձամբ հիշեցնում է, որ իրենք քաղաքական հարցերով չեն զբաղվում։ Հարց եմ տալիս՝ միթե տոտալ շրջափակման մեջ 2 մանկահասակ երեխաների մահը քաղաքականության արդյունք չէ՞։ Ինչո՞ւ ՄԱԿ-ի երևանյան գրասենյակը մինչ օրս չի բարձրաձայնել, որ այսօր տոտալ շրջափակման մեջ գտնվող Արցախի հանդեպ ցեղասպանությունն ընթացքի մեջ է։ Այսօր Արցախը գտնվում է հյուծման միջոցով ցեղասպանության ընթացքի մեջ»։ ՄԱԿ-ի երևանյան գրասենյակը պարտավոր է միջնորդ լինել Նյու Յորքում ՄԱԿ-ի գրասենյակի և մեր միջև և տեղ հասցնի նրանց, որ ՄԱԿ-ը կարիք ունի վարկանիշի փրկության։ ՄԱԿ-ը չպետք է մոռանա, որ ինքը իրավահաջորդ է Ազգերի լիգայի, որը չի ճանաչել Արցախն Ադրբեջանի մաս։ ՄԱԿ-ը պետք է տիրություն անի իր բազում կոնվենցիաներին, որոնցով այսօր Արցախի Հանրապետությունը դե ֆակտո և դե յուրե կայացած հանրապետություն է»,- ասաց Ավագյանը։

Նա հավելեց, որ վերջերս ՄԱԿ-ի պատասխանատու պաշտոնյաներին նամակներ են հղել, որում հիշեցրել են, որ առնվազն Արցախյան առաջին պատերազմից 820 հազար հայեր փախստական են դարձել, երկրորդ պատերազմից, ինչպես ֆիքսել է հենց ՄԱԿ-ը, 26 հազար 750 փախստական կա։ «Պահանջել ենք, որպեսզի ՄԱԿ-ի փախստականների հարցերով հանձնակատարը գա Հայաստան և տեղում հասկանա, թե ինչ մտահոգություններ ունեն հայ փախստականները։ Երկրորդ կետով դիմել ենք, որպեսզի գլխավոր քարտուղարի՝ ցեղասպանության կանխարգելման հարցով խորհրդականը տրամադրի տեղեկատվություն, թե ՄԱԿ-ը ինչ գործողություններ է անում Ադրբեջանի կողմից Արցախի հայության դեմ հյուծման միջոցով տարվող ցեղասպանությունը կասեցնելու և հետագայում այն կանխարգելելու համար»,- մանրամասնեց Մարիամ Ավագյանը։

Բողոքի մասնակիցները կգնան նաեւ Ռուսաստանի դեսպանատան մոտ։

Ադրբեջանի զինված ուժերի ստորաբաժանումները հուլիսի 17-ին ժամը 00:05-01:40-ն ընկած ժամանակահատվածում, հրաձգային զենքերից կրակ են բացել Սոթքի և Ներքին Հանդի հատվածում տեղակայված հայկական դիրքերի ուղղությամբ: Այս մասին հայտնում են  Հայաստանի պաշտպանության նախարարությունից:

Հուլիսի 16- ին` ժամը 20:20-ի սահմաններում ադրբեջանական զինուժը Մարտակերտի շրջանում խախտել է հրադադարը’ կիրառելով հրաձգային զենք։ Այս մասին հայտնեցին Արցախի Հանրապետության պաշտպանության նախարարությունից։

Հայկական կողմում կորուստներ չկան։

Տեղի ունեցածի մասին հաղորդվել է ՌԴ խաղաղապահ զորակազմի հրամանատարությանը։

Բրյուսելում Նիկոլ Փաշինյանի ու Իլհամ Ալիևի հետ գրեթե երեք ժամ տևած հանդիպումից հետո Եվրոպական խորհրդի նախագահը կարևոր համարեց Աղդամով հումանիտար մատարակարարումներ իրականացնելու Ադրբեջանի պատրաստակամությունը, միաժամանակ շեշտեց, որ Արցախը Հայաստանին կապող միակ՝ Լաչինի ճանապարհը պետք է բացվի։

Նախօրեին Ադրբեջանի արտգործնախարար Ջեյհուն Բայրամովն Ադրբեջանում Կարմիր խաչի ներկայացուցչության ղեկավարի հետ հանդիպմանն ասել է, թե Ղարաբաղի հայերի կարիքները բավարարելու համար Բաքուն չի բացառում Աղդամ-Ստեփանակերտ ճանապարհով «օգնություն ցուցաբերելու» հնարավորությունը։

«Ես շեշտել եմ, որ անհրաժեշտ է բացել Լաչինի ճանապարհը, նաև ընդգծել եմ Աղդամով հումանիտար մատակարարումներ իրականացնելու Ադրբեջանի պատրաստակամությունը։ Ես երկու տարբերակն էլ կարևոր եմ համարում և կոչ եմ անում երկու կողմին էլ իրականացնել հումանիտար մատակարարումներ, որպեսզի տեղի բնակչության կարիքները բավարարվեն», – ասաց Միշելը՝ նաև ողջունելով միջազգային Կարմիր Խաչի կողմից բժշկական տարհանումների վերսկսումը։

Անկեղծ ու բովանդակային գնահատելով Հայաստանի ու Ադրբեջանի առաջնորդների բանակցությունները՝ Եվրոպական խորհրդի նախագահն ասաց, որ անդրադարձել են նաև Լեռնային Ղարաբաղի ժողովրդի իրավունքներին ու անվտանգությանը։

«Տեղի բնակչությունը հավաստիացումների կարիք ունի՝ առաջին հերթին իր իրավունքների ու անվտանգության վերաբերյալ։ Այս համատեքստում ես արտահայտել եմ Եվրամիության աջակցությունը Լեռնային Ղարաբաղի նախկին ինքնավար շրջանի և Բաքվի ուղիղ երկխոսությանը։ Այս երկխոսությունը պետք է ապահովի բոլոր կողմերի համար այդքան անհրաժեշտ վստահությունը», – ընդգծեց Միշելը:

Անդրադառնալով խաղաղության պայմանագրի շուրջ բանակցություններին՝ Եվրոպական խորհրդի նախագահը հայտարարեց, թե այժմ դրանց ամենավճռական փուլն է. – «Ես գովաբանում եմ առաջնորդներին խաղաղության գործընթացի նկատմամբ իրենց հստակ հանձառության համար և կոչ եմ անում նրանց ձեռնարկել հաջորդ խիզախ քայլերը՝ ապահովելու կարգավորման ճանապարհին վճռական ու անշրջելի առաջընթաց»։

Խոստովանելով, որ այս հանդիպումը կայացավ տեղում աճող լարվածության ֆոնին, Միշելը կարևորեց քաղաքական քննարկումները՝ տեղեկացնելով, որ այս անգամ ևս վարչապետ Փաշինյանն ու նախագահ Ալիևը վերահաստատել հարգանքը մյուս երկրի տարածքային ամբողջականության ու ինքնիշխանության նկատմամբ։

«Հետևաբար՝ Հայաստանի տարածքը կազմում է 29 800 քառակուսի կմ, իսկ Ադրբեջանինը՝ 86 600։ Երկու առաջնորդներն էլ հաստատեցին իրենց միանշանակ հավատարմությունը 1991 թվականի Ալմա-Աթայի հռչակագրին, որն ընդունում են որպես քաղաքական հիմք։ Այս առիթով մենք ողջունում են երկու երկրների սահմանային հանձնաժողովների հուլիսի 12-ի հանդիպումը։ Այս հանձնաժողովների կանոնադրության և դելիմիտացիայի հիմքերի շուրջ աշխատանքն առաջ է գնացել։ Եվ դա շատ կարևոր է, ղեկավարները համաձայնեցին արագացնել հանձնաժողովների աշխատանքը», – ասաց ԵՄ խորհրդի նախագահը:

Արցախի շուրջ 30 հասարակական կազմակերպությունների ներկայացուցիչներ հանդիպել են այսօր պետնախարար Գուրգեն Ներսիսյանի հետ՝ քննարկելու Համաժողովրդական շարժման իրավիճակն ու նպատակները և առաջարկներ ներկայացնելու հետագա քայլերի համար։

Պետական ​​նախարար Գուրգեն Ներսեսյանը, դիմելով ՀԿ-ների ներկայացուցիչներին, նշեց, որ «այլեւս չենք կարող սպասել, պետք է գործել, դրա համար նախաձեռնել ենք համաժողովրդական շարժում, որը պետք է հասնի նպատակին»։
«Շարժումը սկսվեց երեկ, մարդիկ միացան, եւ մենք պետք է շարունակենք, մինչեւ հասնենք նախանշված նպատակին՝ Արցախի ապաշրջափակմանը»,- ասաց Ներսիսյանը։
Նրա խոսքով՝ երեկվա ակցիայից հետո Արցախի նկատմամբ հետաքրքրությունը մեծացավ, և Շարժմանը միանալու առաջարկներ սկսեցին գալ։ Հայաստանը նմանատիպ ակցիաներով աջակցեց Արցախի ժողովրդին։
Ներսիսյանի խոսքով, Շարժումը միանվագ չէ, առաջիկա օրերին այն կշարունակվի Ստեփանակերտում և շրջկենտրոններում։ Նա հորդորեց համախոհներին և հակառակորդներին բացառել Շարժմանը խոչընդոտելու կամ ստեղծված իրավիճակն սեփական շահերի համար օգտագործելու բոլոր փորձերը։
Արցախի օմբուդսմեն Գեղամ Ստեփանյանը կոչ է արել հասարակական կազմակերպություններին հայտարարությունների ու առաջարկների տեսքով արտահայտել իրենց դիրքորոշումն ու առաջարկները, ներկայացնել իրավիճակի իրենց տեսլականը։
«Երեկ այն բանից հետո, երբ ժողովուրդն իր պահանջներն արտահայտեց և դրանք հաստատեց երթով, համաշխարհային հանրության հետաքրքրությունն Արցախի նկատմամբ մեծացել է, բայց մենք չենք կարող դրանով սահմանափակվել», – նշել է օմբուդսմենը։
ՀԿ ներկայացուցիչները իրենց հետաքրքրող հարցեր ուղղեցին և առաջարկեցին ստեղծել շարժման հանձնաժողով և դերեր հատկացնել, մշակել շարժման ճանապարհային քարտեզ, ամրապնդել տեղեկատվական բլոկը, սկսել սերտորեն աշխատել Սփյուռքի հետ և ակտիվացնել Շարժման աջակցությունը Հայաստանում, բացահայտելով յուրաքանչյուր կազմակերպության ներուժը և նրանց հնարավորությունները ընդհանուր գործի և Շարժման համար օգտակար լինելու համար:

Հայաստանի վարչապետ Նիկոլ Փաշինյանի, Եվրոպական խորհրդի նախագահ Շառլ Միշելի և Ադրբեջանի նախագահ Իլհամ Ալիևի` Բրյուսելում կայացած եռակողմ հանդիպմանը քննարկվել են Լաչինի միջանցքի արգելափակումը, ԼՂ հումանիտար ճգնաժամը և այլ հարցեր։

Այս մասին «Արմենպրես»-ին հայտնեցին ՀՀ կառավարությունից։

«Հանդիպման ընթացքում քննարկվել են Ադրբեջանի կողմից Լաչինի միջանցքի ապօրինի արգելափակման հետևանքով Լեռնային Ղարաբաղում ստեղծված խորացող հումանիտար ճգնաժամին, երկու երկրների միջև սահմանազատման և սահմանային անվտանգության ապահովման աշխատանքներին, տարածաշրջանային տրանսպորտային և տնտեսական ենթակառուցվածքների ապաշրջափակմանը, Հայաստանի և Ադրբեջանի միջև հարաբերությունների կարգավորման համաձայնագրին, Լեռնային Ղարաբաղի ժողովրդի իրավունքների և անվտանգության հասցեագրմանը, ինչպես նաև գերիների, անհետ կորածների և այլ հումանիտար խնդիրներին վերաբերող հարցեր:

Պայմանավորվածություն է ձեռք բերվել ակտիվացնել աշխատանքները քննարկված հարցերի կարգավորման ուղղությամբ», – ասված է կառավարության հաղորդագրությունում։