Կարիք չկա կասկածի տակ դնել այն, ինչ մերն է։ Դադիվանքը մե՞րն է․ Մելիքյան
- 14:08 08.04.2024
«Մեր հետագա ճակատագիրը լուծվում է Տավուշում, Տավուշը մեր դարպասն է»,- այսօր լրագրողների հետ հանդիպման ժամանակ ասաց արեւելագետ, Արցախի Պաշտպանության բանակի գնդապետ Գուրգեն Մելիքյանը։
«Մենք պարտավոր ենք եւ Ոսկեպարը, եւ Կիրանցը, եւ Բաղանիսը պահելու։ Յուրաքանչյուրս պարտավոր ենք պահելու հայրենիքի այդ հատվածը։ Դա նույնն է, ինչ Արտաշատը, Արագածոտնի մարզը, Կոտայքը, Գեղարքունիքը։ Մեր պարտավոր ենք հայրենիքի ցանկացած սանտիմետրը պահել սրբությամբ, մեր տղաները դրա համար են զոհվել, որ մենք ունենանք հայրենիք։ Միակողմանի զիջումը ոչ մի բան չի տալու մեզ, մենք ստորացված վիճակում ենք լինելու։ Մենք գիտենք խաղաղության արժեքը եւ գիտենք այն արյան արժեքը, որը մեր տղաները թափել են գիտակցելով։ Ես ամբողջ էությամբ պայքարելու եմ ամեն մի սանտիմետրի համար»,- ասաց նա։
Մելիքյանն անդրադարձավ հարցին, թե որ տարածքներն են հայկական, որոնք՝ ոչ։ «Այնտեղ հուշարձաններն արդեն ասում են, որ տարածքները հայկական են։ Կարիք չկա կասկածի տակ դնել այն, ինչ մերն է։ Դադիվանքը մե՞րն էր, թե՞ մերը չէր, Ծիծեռնավանքը մե՞րն էր, թե՞ մերը չէր՝ 4-րդ դարի հուշարձան, իհարկե, մերն է։ Այսօր պղծում են մեր սրբավայրերը։ Ուղղակի պետք է արձանագրենք, որ ապաշնորհ մարդիկ չեն կարողանում պահել հայոց երկիրը, թույլ են տալիս պղծելու մեր սրբությունները»,- ասաց նա։
Գուրգեն Մելիքյանն ասաց, որ իր խոսքով կոչ է անում համախմբվել․ «Այսօր այն երիտասարդները, որ գնում են Տավուշ՝ Ոսկեպար, Կիրանց, Բաղանիս, գնում են՝ մեզ ոգեւորելու, որ մարդն իր հայրենի տունը չվաճառի։ Այնտեղ միայն տան հարցը չէ, հողի հարցը չէ, տարածքի հարցը չէ, հայրենիքի հարց է։ Մենք պետք է կարողանանք ապաշնորհ մարդկանց ասել՝ եթե դուք չեք կարողանում ղեկավարել, հեռացեք, գնացեք, բավ է, ինչքա՞ն զիջենք։ Իմ արժանապատվության գնով ես խաղաղություն չեմ ուզում։ Մենք պետք է մեր ոգին վերականգնենք, եւ ամեն ինչ կընկնի իր տեղը, ես լիահույս եմ»։