Ոչխարները, հովիվը ու նորմալ սահմանապահները
- 12:51 12.04.2024
ՀՀ ԱԱԾ-ն հաղորդում է տարածել ապրիլի 10-ին Սյունիքի սահմանին տեղի ունեցած միջադեպի մասին, երբ հայ հովիվը գնացել է մոլորված հոտի հետևից և հայտնվել շփման գծի այն կողմում, փոխհրաձգություն է տեղի ունեցել, և հովիվն ու նախիրը վերադարձվել է։
ԱԱԾ-ն իր հաղորդագրության մեջ մեղադրում է իրենց պարտականությունները կատարող սահմանապահներին «ազգային անվտանգությանը սպառնալիք ստեղծելու» և ադրբեջանցի սահմանապահին վիրավորելու մեջ։ ԱԱԾ-ն անգամ նյութեր է ուղարկել Քննչական կոմիտե՝ գործ հարուցելու համար։
ԱԱԾ-ն և ՊՆ-ն նույն դիրքորոշումն են արտահայտել փետրվարի 14-ի միջադեպից հետո, երբ հակառակորդը, իբր, հայկական կողմից արձակված կրակոցի պատճառով, ոչնչացրել է հայկական դիրք և սպանել 4 հայ աշխարհազորայինների։ Այն ժամանակ էլ ԱԱԾ-ն հայտարարեց, որ հետաքննում են սահմանը հսկող հայ զինվորականների գործողությունները, այն սահմանը, որը, ըստ կառավարության ղեկավարի, գոյություն չունի։
Յուրաքանչյուր նման հաղորդագրություն՝ հոգեբանական տեռորի ակտ է հայ տղամարդկանց նկատմամբ, ովքեր իրենց պարտքն են համարում պաշտպանել մեծ տունը՝ իրենց հայրենիքը։ Յուրաքանչյուր նման հաղորդագրություն՝ պատմություն է ոչխարների, հովվի և նորմալ տղամարդկանց մասին: