Բայդենը հայտարարել է Գազայի համար խաղաղության նոր եռափուլ ծրագրի մասին
- 19:00 01.06.2024
ԱՄՆ նախագահ Ջո Բայդենը հանդես է եկել Գազայում պատերազմը դադարեցնելու և իսրայելցի պատանդներին ազատելու եռափուլ ծրագրի առաջարկով։
Բայդենի խոսքով՝ Իսրայելի կառավարությունն արդեն համաձայնել է այս ծրագրին։
Իսրայելցի քաղաքական գործիչները սովորաբար հայտարարություններ չեն անում հրեական շաբաթի ընթացքում։ Երկրի կառավարության մամուլի ծառայությունը ԱՄՆ նախագահի ելույթից հետո ասել է, որ Իսրայելը չի հրաժարվում ՀԱՄԱՍ-ի ամբողջական ոչնչացման ծրագրերից, այլ առաջարկում է պատանդներին ազատ արձակելու համաձայնագրի «ուրվագծերը»։
Մինչ այժմ Իսրայելի վարչապետ Բենիամին Նեթանյահուն մերժել է մշտական հրադադարի ցանկացած առաջարկ, քանի որ դրանք ենթադրում են ՀԱՄԱՍ-ի ոչնչացման մերժում։
Նրա կառավարության ծայրահեղ աջակողմյան նախարարներն ավելի կտրականապես են դեմ արտահայտվել. հակառակ դեպքում նրանք սպառնում էին դուրս գալ իշխող կոալիցիայից, որից հետո կառավարությունը կկորցնի երկիրը կառավարելու հնարավորությունը։
«Իսրայելի կողմից առաջարկվող հստակ ուրվագծերը, ներառյալ փուլից փուլ անցնելու պայմանները, թույլ կտան Իսրայելին հավատարիմ մնալ այս սկզբունքներին [Համասի ռազմական և կազմակերպչական կարողությունների ոչնչացման – խմբ.]», – ասվում է կառավարության հայտարարության մեջ:
Բայդենը կոչ է արել ՀԱՄԱՍ արմատական խմբին համաձայնվել առաջարկվող գործարքին։
«Հիմա իսկապես որոշիչ պահ է։ ՀԱՄԱՍ-ն ասում է, որ ցանկանում է հրադադար հաստատել: Այս գործարքը հնարավորություն է գործով ապացուցելու իր խոսքերը»,- ասել է Բայդենը՝ ելույթ ունենալով Սպիտակ տանը։
Մինչդեռ, բանակցություններին մոտ կանգնած պաղեստինցի պաշտոնյաներից մեկը, ով տեսել է Իսրայելի նոր առաջարկը, ասաց, որ փաստաթուղթը չի ներառում պատերազմի ավարտի կամ Գազայի հատվածից Իսրայելի պաշտպանության բանակի զորքերի ամբողջական դուրսբերման երաշխիքներ:
Անհասկանալի է նաև, թե ով է ղեկավարելու Գազան, ըստ ծրագրի, երբ պատերազմն ավարտվի։
Խմբավորման հայտարարության մեջ, որը մեջբերում է Reuters-ը, ասվում է, որ ՀԱՄԱՍ-ը կքննարկի «ցանկացած առաջարկ, որը հիմնված է մշտական հրադադարի և [իսրայելական ուժերի] Գազայի հատվածից ամբողջական դուրսբերման, [Գազայի] վերակառուցման և տեղահանվածների վերադարձի վրա, ինչպես նաև բանտարկյալների փոխանակման գործարքի իրականացումը», եթե Իսրայելը «հայտարարի իր հանձնառությունը նման գործարքին»։