Ապաշրջափակման համատեքստում կա՞ քննարկում, որ ճանապարհների վերահսկողությունը պետք է պատվիրակվի միջազգային որեւէ կազմակերպության
- 14:37 11.06.2024
«Հայկական կողմից մենք բոլոր ենթակառուցվածքային աշխատանքները կատարել ու ավարտել ենք, եւ Մարգարայի անցակետը պատրաստ է շահագործման, իսկ թուրքական կողմից մենք չենք տեսել քայլեր այս պայմանավորվածության իրագործման ուղղությամբ։ Բայց մենք հույս ունենք, որ այդ քայլերը կիրականացվեն»,- այսօր խորհրդարանում լրագրողներին ասաց ԱԺ փոխնախագահ Ռուբեն Ռուբինյանը։
«Խոսքը 2022 թվականի հուլիսին ձեռք բերված պայմանավորվածության մասին է, ըստ որի՝ Հայաստանի եւ Թուրքիայի միջեւ ցամաքային սահմանը պիտի բացվի երրորդ երկրների քաղաքացիների եւ դիվանագիտական անձնագիր կրող անձանց համար»,- ասաց նա։
Անդրադառնալով հարցին, թե ապաշրջափակման համատեքստում կա՞ քննարկում, որ ճանապարհների վերահսկողությունը պետք է պատվիրակվի միջազգային որեւէ կազմակերպության, Ռուբինյանը պատասխանեց. «Մեր դիրքորոշումը հետեւյալն է, որ տարածաշրջանային կոմունիկացիաները պետք է ապաշրջափակվեն երկրների ինքնիշխանության, իրավազորության ներքո եւ հավասարության սկզբունքով»։