Փաշինյանը գնդակը նետեց Եվրոպայի կողմը. Իսկ ԵՄ-ում սպասում են, որ Հայաստանը պոկվի Ռուսաստանից

Նիկոլ Փաշինյանը մեկնաբանել է ԵՄ-ին երկրի անդամակցության մասին հանրաքվեի անցկացման իրագործելիությունը. այս մասին նա խոսել է Հայկական ժողովրդավարության ֆորումի ժամանակ։

Նրա խոսքով՝ կան հանրաքվե անցկացնելու առաջարկներ, որոնք ցույց կտան ժողովրդի աջակցությունն այս գաղափարին։ Փաշինյանը հիշեցրեց, որ Եվրախորհրդարանի ամբիոնից հայտարարել է. Հայաստանը պատրաստ է ԵՄ-ին մոտ լինել այնքան, որքան դրան պատրաստ է Եվրամիությունը։

«Հիմա հանրաքվե անե՞նք, թե՞ ոչ… Եթե այս հարցը հանրաքվեի դնենք, պետք է քարոզարշավ անենք։ Երբ մենք դա իրականացնենք, մարդիկ հարցեր կտան՝ ե՞րբ, ինչպե՞ս, ի՞նչ ժամկետներում, ի՞նչ քայլերով։ Եվրամիությունը սա ուզո՞ւմ է, թե՞ ոչ, պատրա՞ստ է Եվրամիությունը։ Կարո՞ղ եմ այս հարցերի պատասխանները տալ՝ ոչ»,- ասաց Փաշինյանը։

Նա նաև ուշադրություն հրավիրեց բուն Եվրամիությունում տեղի ունեցող գործընթացներին։ Օրինակ՝ ԵԽ ընտրությունները որոշակի հարցեր են առաջացնում։

Ըստ «Ազատ Եվրոպա/Ազատություն» ռադիոկայանի եվրոպական հարցերով փորձագետ Ռիկարդ Յոզվիակի՝ եվրոպական երկրներում աջ ազգայնական ուժերի ամրապնդումը կարող է խանգարել Հայաստանի անդամակցությանը եւ ԵՄ ընդլայնմանը։

Խնդիրը նաեւ այն է, որ, «ինչպես ես լսում եմ նաև Եվրամիությունից և Բրյուսելից, նրանք ասում են՝ «այո՛, բայց մենք ուզում ենք տեսնել կոնկրետ քայլեր, որ դու հեռանում ես ռուսական ուղեծրից»։ Իսկ դա նշանակում է հեռանալ ՀԱՊԿ-ից, դա նշանակում է դուրս գալ Մաքսային միությունից։ Եվ նրանք իրականում այնքան էլ չեն հավատում, որ Հայաստանն իսկապես պատրաստ է անել այդ քայլերը Ռուսաստանի հետ»,- ասել է փորձագետը «Ազատությանը»։