Ձախ կոալիցիան հաղթեց Ֆրանսիայում, Մելանշոնը՝ Իսրայելի և Հայաստանի մասին

«Նոր ժողովրդական ճակատ» (NPF) ձախ կուսակցությունների կոալիցիան հաղթել է Ֆրանսիայում խորհրդարանական ընտրությունների երկրորդ փուլում և ստացել 182 մանդատ Ազգային ժողովում, հայտնում են երկրի ՆԳՆ պաշտոնական տվյալները։

Երկրորդ տեղը զբաղեցրել է նախագահ Էմանուել Մակրոնի «Միասին» կենտրոնամետ կոալիցիան (168 մանդատ), երրորդ տեղում՝ ծայրահեղ աջ «Ազգային հանրահավաքը» (RN)՝ Մարին Լը Պենի և Ջորդան Բարդելլայի ղեկավարությամբ, որը ստացել է 143 մանդատ։

Ընտրություններին մասնակցությունը կազմել է 66,63 տոկոս։

Ընդ որում, ոչ մի քաղաքական ուժի չի հաջողվել մեծամասնություն ստանալ խորհրդարանում։ Ազգային ժողովն ունի 577 պատգամավոր, իսկ մեծամասնության համար անհրաժեշտ է 289 մանդատ։

«Ազգային հանրահավաքը» գրավեց առաջին տեղը առաջին փուլում և հույս ուներ ուժեղ արդյունքի հասնել կիրակի օրվա քվեարկության ժամանակ, սակայն երկրորդ փուլից առաջ ձախերն ու Մակրոնի կողմնակիցները միավորեցին ուժերը՝ կանխելու ծայրահեղ աջերի հաղթանակը:

Երկու օրվա ընթցքում Մեծ Բրիտանիայում և Ֆրանսիայում իշխանությունը փոխվեց. ձախերը վերադարձան։ Առանցքային երկրներում իշխանափոխության հետ կապված բարձրացված հիմնական հարցերից մեկը Իսրայելի նկատմամբ վերաբերմունքն է։

«Իսրայելի և Գազայի հատվածի դեմ սանձազերծված բոլոր բռնությունները միայն մեկ բան են ապացուցում. բռնությունը բռնություն է ծնում և ինքն իրեն վերարտադրում։ Մենք սարսափում ենք, և մեր մտքերն ու կարեկցանքը ուղղված են բոլոր նրանց, ովքեր տուժել են դրանից: Անհրաժեշտ է զինադադար. Ֆրանսիան պետք է դրան հասնի քաղաքական և դիվանագիտական ​​ուժերով», – ավելի վաղ հայտարարել էր Ֆրանսիայի ծայրահեղ ձախերի առաջնորդ Ժան-Լյուկ Մելենշոնը, նրա խոսքով, տարածաշրջանը պետք է վերադառնա Իսրայելի և Պաղեստինի ժողովուրդների խաղաղ գոյակցությանը, ինչպես նշված է ՄԱԿ-ի բանաձեւերում:

Բացի այդ, ձախերի առաջնորդ Ժան-Լյուկ Մելանշոնը Հայաստան է ժամանել 2024 թվականի ապրիլի 24-ին և մեղադրել Իսրայելին Ադրբեջանին զենք մատակարարելու մեջ՝ դրա դիմաց Իսրայելի գործողությունների համար հարթակ ստանալով։