Ո՞ւմ համար է Ռուսաստանը Երևանում կառուցում «Ռուս ուղղափառ եկեղեցու թեմական կենտրոն»
- 17:53 24.07.2024
Sputnik-ի փոխանցմամբ՝ Երեւանում կկառուցվի Ռուս ուղղափառ եկեղեցու նոր թեմական կենտրոն։ «Ռոսսոտրուդնիչեստվոյի» հայաստանյան ներկայացուցչության հաղորդմամբ, այս մասին ասել է Երևանի հայոց թեմի ժամանակավոր կառավարիչ Պոդոլսկի և Լյուբերցի Ակսիյ արքեպիսկոպոսը։
Ռուս ուղղափառ եկեղեցին, որը 2020 թվականի պատերազմից հետո «թեմ» բացեց Հայաստանում, այդպես էլ չի բացատրել, թե որքան ծխական ունի Հայաստանում։ Ո՞ւմ համար է Ռուս ուղղափառ եկեղեցին «թեմական կենտրոն» կառուցում. Ռուսաստանը պատրաստվում է էլ ավելի շա՞տ ռուս զինվոր ուղարկել Հայաստան. Թե՞ նա մտադիր է Հայ առաքելական եկեղեցին «ընդգրկել» Ռուս ուղղափառ եկեղեցու մեջ։
Արցախում, 2020 թվականի պատերազմից հետո, Ռուսաստանը նոր «ռուսական համայնք» սարքեց և նույնիսկ ուղղափառ եկեղեցի կառուցեց Ստեփանակերտի օդանավակայանի տարածքում, որը ժամանակավորապես վերածվել էր ռուսական բազայի։ Մոտակայքում նաև մզկիթ է կառուցվել, քանի որ ռուս զինվորները և՛ ուղղափառություն են դավանում, և՛ իսլամ։
Երևանում կայացած հանդիպմանը մասնակցել է «Լեռնային Ղարաբաղի ռուսական համայնքի ղեկավար Ալեքսանդր Բորդովը, ով հարգարժան հյուրին նվիրել է այս դարի ընթացքում Լեռնային Ղարաբաղի տարածքում կառուցված առաջին ուղղափառ եկեղեցու ալբոմը»։
Այս «տաճարի» կառուցումից հետո բնիկ հայ բնակչությունը ռուսական զորքերի օպերատիվ կառավարմամբ տեղահանվեց Արցախից, յուրացվեցին նրա տարածքները, ունեցվածքը, հուշարձաններն, իսկ հին հայկական եկեղեցիները քիչ էր մնում ուղղափառ հռչակվեցին։
Ռուս ուղղափառ եկեղեցու՝ Հայաստանում «թեմական կենտրոն» բացելու մտադրությունը լինելու է նույն գործընթացների նախակարապետը, ինչ Արցախում։