Էրդողանը մեղադրել է «որոշ լոբբիներին» Հայաստանի վերացման գործընթացը խաթարելու մեջ

Էրդողանը ելույթ է ունեցել Նյու Յորքում թուրք-ամերիկյան ազգային ղեկավար կոմիտեի կազմակերպած ճաշկերույթի ժամանակ.

«Դուք բոլորից լավ գիտեք՝ ինչ անհարմարություններ են առաջացել թուրք-ամերիկյան հանրության շրջանում։ Պետք է զգոն լինենք այն մտածելակերպի նկատմամբ, որը փորձում է թունավորել մեր երեխաների և երիտասարդների միտքը՝ դպրոցական ծրագրերը լցնելով անհիմն զրպարտություններով: Ձեր միասնությունն ու համակարգումն ամերիկացի քաղաքական գործիչներին թույլ կտան իմանալ պատմական ճշմարտությունը։ Հարցերի քաղաքական օգտագործումը, որոնցով պետք է զբաղվեն պատմաբանները, և տարբեր լոբբիների օգտագործումը չեն նպաստի ո՛չ թուրք-ամերիկյան, ո՛չ հայ-թուրքական հարաբերությունների կարգավորմանն ուղղված մեր ջանքերին»,-ասել է Էրդողանը։

Էրդողանը նկատի ունի հայկական լոբբիին, որը 100 տարի շարունակ կարողացել է կանխել 1921 թվականի ռուս-թուրքական պայմանագրերի օրինականացումը և հայ ժողովրդի պատմական տարածքում հայկական պետականության վերացումը։ Հայկական լոբբիի ջանքերով ամերիկյան դպրոցական դասագրքերում սեւով սպիտակի վրա գրված է, որ Թուրքիան իրականացրել է հայերի ցեղասպանությունը, յուրացրել է նրանց հողն ու ունեցվածքը։ Սա անընդհատ դամոկլյան սրի պես կախված է Թուրքիայի գլխին՝ հիշեցնելով, որ այս երկիրը ստեղծվել է օտար հողի վրա` Ռուսաստանի օգնությամբ։

Էրդողանը պատրաստվում է Նյու Յորքում հանդիպել Փաշինյանի հետ, եւ հնարավոր է, որ խոսեն հայ-թուրքական սահմանի բացման մասին։ Սա կնշանակի Հայաստանի կողմից ռուս-թուրքական սահմանի ճանաչում, որը որոշվել է 100 տարի առաջ ռուս-թուրքական հանցավոր պայմանագրերով։

Ի դեպ այսօր Հայաստանում հավատարմագրված ԵՄ երկրների մի խումբ դեսպաններ այցելել են հայ-թուրքական պայմանական սահմանի Մարգարա անցակետ՝ ՀՀ պետական ​​եկամուտների կոմիտեի ղեկավար Ռուստամ Բադասյանի ուղեկցությամբ։

Չնայած այն հանգամանքին, որ Հայաստանի Անկախության հռչակագրի 11-րդ կետում ասվում է. «Հայաստանի Հանրապետությունը հանդես է գալիս Օսմանյան Թուրքիայում և Արևմտյան Հայաստանում 1915 թվականի Հայոց ցեղասպանության միջազգային ճանաչման օգտին», Հայաստանի ներկայիս կառավարությունը վարում է բացահայտ ժխտողական քաղաքականություն սեփական հողերի ու ունեցվածքի նկատմամբ հայ ժողովրդի իրավունքների դեմ։

Էրդողանը նշում է, որ «որոշ լոբբիներ» կանխում են դա՝ նկատի ունենալով հայկական իրավունքների կրող ուժերը։ Դա վերաբերում է և՛ հայկական սփյուռքին, որը մեծամասամբ ցեղասպանության հետևանք է, և՛ Հայ առաքելական եկեղեցուն, որը Օսմանյան կայսրության օրոք եղել և մինչ օրս մնում է հայ համայնքի «վստահելի» ներկայացուցիչը թուրքական պետական ​​կառույցում։

Հայաստանի գործող իշխանությունը մեթոդական աշխատանք է տանում սփյուռքում հայկական լոբբիի աշխատանքը և Հայ առաքելական եկեղեցու իրավունքները չեզոքացնելու ուղղությամբ։ Նիկոլ Փաշինյանը վերջերս հանդիպել է հայկական սփյուռքի ներկայացուցիչների հետ և հստակ ասել, որ սփյուռքը չպետք է խառնվի Հայաստանի գործերին եւ “խանգարի” “խաղաղ գործընթացին”։ Բացի այդ, նա բացասաբար է արտահայտվել Հայ առաքելական եկեղեցու «Հայաստանից դուրս» ունեցած ունեցվածքի մասին։

Էրդողան-Պուտին և նրա արբանյակ Ալիևի՝ հայկական իրավունքները զրոյացնելու և հայկական պետականությունը վերացնելու փորձերին խոչընդոտում են սփյուռքը, «որոշակի լոբբին», եկեղեցին և պատմությունը: Անկարայի, Մոսկվայի և Բաքվի պլանների “խոչընդոտներին” ավելացել են նաև Հայաստանում ԵՄ դիտորդները, ԵԱՀԿ Մինսկի խումբը, Հայաստանի Սահմանադրությունը, Հայաստանի ռազմականացումը, Ֆրանսիայի, Իրանի հայանպաստ քաղաքականությունը և ամերիկյան ժողովրդավարությունը։ Բաքուն առաջ է քաշում այդ «խոչընդոտների» վերացումը՝ որպես «խաղաղության պայմանագրի», այսինքն՝ Հայաստանի վերացման պայման։

Թուրքիան կարող է ճեղքել հայկական իրավունքների բազմաշերտ զրահը միայն հայկական «իսթաբլիշմենտի» ձեռքով, որը զարմանալի հեշտությամբ է հրաժարվում ազգային իրավունքներից։

Նաիրա Հայրումյան