Իրանի նախագահը խոսել է «ռուսական ագրեսիայի» մասին
- 22:50 23.09.2024
Իրանի նորընտիր նախագահ Մասուդ Պեզեշկյանը հայտարարել է, որ ցանկանում է բանակցել արևմտյան երկրների հետ Ուկրաինայի պատերազմի շուրջ, որը նա որակել է որպես «ռուսական ագրեսիա»:
«Մենք կցանկանայինք երկխոսություն և բանակցություններ սկսել եվրոպացիների և ամերիկացիների հետ»,- ասել է Պեզեշյանը լրագրողներին Նյու Յորքում ՄԱԿ-ի Գլխավոր ասամբլեայի շրջանակներում (մեջբերում է AFP-ն): «Մենք երբեք չենք աջակցել ռուսական ագրեսիային ուկրաինական տարածքի հանդեպ»։
Անցյալ շաբաթ Պեզեշյանը Դուբայում հանդիպել է ՌԴ Անվտանգության խորհրդի քարտուղար, պաշտպանության նախկին նախարար Սերգեյ Շոյգուի հետ։
Որոշ ուժեր, այդ թվում՝ Արևմուտքում, ամեն կերպ փորձում են Իրանը կապել Ռուսաստանի հետ, օրինակ՝ բոլոր ռուսական անօդաչու սարքերին անվանում են «շահեդներ», կարծես Ուկրաինան կռվում է ոչ թե Ռուսաստանի, այլ Իրանի դեմ։
Մինչդեռ մի քանի շաբաթ առաջ Իրանը ուղղակիորեն մեղադրեց Ռուսաստանին «Զանգեզուրի միջանցքը» ճեղքելու, ռազմական բախումներ հրահրելու և հայ-իրանական սահմանը զավթելու մտադրության մեջ։ Մոսկվան, փաստորեն, չհերքեց նման մտադրությունը. Իրանի դեմարշից անմիջապես հետո Հայաստան ժամանեց ՌԴ փոխվարչապետ Օվերչուկը և կրկին հայտարարեց, որ «միջանցքը» պետք է բացվի «եռակողմ համաձայնագրերի» համաձայն, այսինքն՝ Ռուսաստանի Դաշնություն վերահսկողության տակ։
Հայաստանում ռուսամետ ուժերը «չնկատեցին» Իրանի մեղադրանքները Ռուսաստանի հասցեին։ Ճիշտ այնպես, ինչպես արևմտյան մամուլը, որը վերահսկվում է հիմնականում իսրայելամետ կորպորացիաների կողմից, չնկատելու է տալիս Իրանի մեղադրական հայտարարությունները Ռուսաստանի դեմ։