Ինչ իրավական հիմքով են հանձնվել Շուռնուխի, Կիրանցի հատվածներում Հայաստանի իրավազորության տակ գտնվող տարածքները. եթե չկա այդպիսի իրավական հիմք, հիմա նոր այս կանոնակարգով է ստեղծվում այդ հիմքը, ապա ձեր գործողությունն ինչպես կբնութագրեք՝ հանցագործությո՞ւն, ապաշնորհությո՞ւն: Այս մասին, այսօր՝ հոկտեմբերի 2-ին, ԱԺ-ում հարցուպատասխանի ժամանակ դիմելով ՀՀ վարչապետ Նիկոլ Փաշինյանին, ասաց «Հայաստան» խմբակցության քարտուղար Արծվիկ Մինասյանը:
Փաշինյանի խոսքով, այո՛, ՀՀ տարածքներից ավելի քան 200 քկմ տարածք օկուպացված է, բայց նաեւ ասում ենք, որ ռազմական ճանապարհով դրանք վերադարձնելու խնդիր չենք դնում, քանի որ այդ կանոնակարգը ստեղծում է հնարավորություն, որ իրավական, դիվանագիտական, բանակցային ճանապարհով այդ խնդիրը լուծվի:
Անդրադառնալով նրան, որ Կիրանցի եւ Շուռնուխի մի շարք բնակիչներ անգամ սեփականության վկայականներ են ունեցել, սակայն այդ տարածքները տրվել են Ադրբեջանին, վարչապետն ասաց. «Մենք ասել ենք, որ պետք է հասկանանք, թե ինչ հիմքեր ունեն այդ սեփականության վկայականները: Մենք այդ հիմքերը չենք գտել, եւ այդ սեփականության գնահատականներ տալու առիթը ուղարկված է իրավապահ մարմիններին, թե ոնց է, որ իրավական հիմքը չկա, բայց վկայականը կա:
Փաշինյանն այդպես էլ չպատասխանեց, թե ի՞նչ հիմքով են հանձնվել հայկական տարածքները, ինչպե՞ս է որոշվել, որ հողերն են մերը եւ իրենցը, եթե բառացիորեն մի քանի օր առաջ Սահմանադրական դատարանը հաստատել է, որ Հայաստանը “սահմաններ չունի”։