Ոչ ոք չէր կարող պատկերացնել, որ հանկարծ Ադրբեջանը կարող է պահանջել, որ Հայաստանը պատժի պատերազմի հերոսներին
- 13:07 03.10.2024
ԱԺ «Հայաստան» խմբակցության պատգամավոր Արթուր Խաչատրյանը խորհրդարանական ճեպազրույցների ժամանակ անդրադարձավ Ալիեւի նոր պահանջներին՝ Արցախյան պատերազմի մասնակիցներին պատժելու մասին։
«Ադրբեջանից հայտարարում են, որ Հայաստանը դեռ պետք է պատասխան տա 3067 անհետ կորածների համար։ Եվ այդ ելույթի համատեքստում դարձյալ Հայաստանին մեղադրեցին ռեւանշիզմի մեջ։ Հայաստանի իշխանությունները բոլոր նվաստացումներին դիմանում են, բանակցային գործընթաց չկա։ Այն, որ Ադրբեջանը ծանր պահանջներ է դրել, եւ որ դրանք կարող է վերաբերվել նաեւ այսպես կոչված ռեւանշիզմին, չեմ բացառում։ Օրինակ՝ Երեւանի կենտրոնում Վազգեն Սարգսյանի փողոցը կարող է լինել ռեւանշիզմի դրսեւորում։
Այդպես է, ինչքան զիջում ես, այնքան թշնամին առաջ է գալիս։ Ոչ ոք չէր կարող պատկերացնել, որ հանկարծ Ադրբեջանը կարող է պահանջել, որ Հայաստանը պատժի պատերազմի հերոսներին»,- ասաց Արթուր Խաչատրյանը։
«Իրենք թղթի կտոր են ուզում ստորագրել՝ վրան գրված խաղաղություն, իսկ ի՞նչ է մեջը, չեն ասում, գաղտնի են պահում սեփական ժողովրդից։ Իրենց բանակցային գործընթացը բերեց Արցախի շուրջ բանակցությունների վիժեցմանը, պատերազմի, հիմա էլ իրենք են խոստովանում, որ պատերազմը հենց վաղը կարող է սկսվել, COP29-ը հենց վերջանա, շատ ռեալ է այդ ամենը։ Իրենք ասում են՝ մենք լեգիտիմ հիմք ենք ստեղծում, բայց իրենց ստեղծած լեգիտիմ հիմքը փաստորեն լեգիտիմ հիմք է տալիս Ադբեջանին, Ադրբեջանը գնալով ավելի լկտիանում է»,- հայտարարեց Արթուր Խաչատրյանը։