Նախօրեին Իսրայելի ավիահարվածի հետևանքով Գազայում 93 մարդ է զոհվել կամ անհետ կորել
- 16:14 30.10.2024
ВВС
ԱՄՆ-ը սարսափելի է որակել Իսրայելի օդային հարվածը Գազայի հատվածի հյուսիսում գտնվող հինգհարկանի բնակելի շենքին, որի հետեւանքով, ըստ պաղեստինյան աղբյուրների, 93 մարդ է զոհվել կամ անհետ կորել:
Հարվածը տեղի է ունեցել երեքշաբթի գիշերը Բեյթ Լահիա շրջանում։ Սկզբում հաղորդվում էր, որ զոհվել է 93 մարդ, մոտ 40-ը անհետ կորել է։ Արտակարգ ծառայությունները հայտնել են, որ տասնյակ բնակիչներ մնացել են փլատակների տակ։
ԱՄՆ Պետդեպարտամենտի խոսնակ Մեթյու Միլլերը հայտարարել է, որ Վաշինգտոնը չափազանց անհանգստացած է ավիահարվածի հետևանքով բազմաթիվ խաղաղ բնակիչների մահվան կապակցությամբ։
«Սա սարսափելի դեպք է՝ սարսափելի հետևանքներով», – ասաց նա՝ ընդգծելով քսան երեխաների մահը։ «Այն ողբերգական գինը, որը վճարեցին քաղաքացիական անձինք այս վերջին հարվածի ժամանակ, ևս մեկ հիշեցում է, որ մենք պետք է վերջ տանք այս պատերազմին», – ասաց Միլլերը:
Իսրայելի պաշտպանության բանակը հայտարարել է, որ ստուգում է խաղաղ բնակիչների մահվան մասին տեղեկությունները:
Վերջին երկու շաբաթվա ընթացքում իսրայելական զինվորականները լայնածավալ արշավանքներ են իրականացնում Գազայի հատվածի հյուսիսում, մասնավորապես՝ Ջաբալիայում, Բեյթ Հանունում և Բեյթ Լահիայում։