Հասարակությանը պետք է ասել՝ այս ո՞ւմ եք ընտրել. Արամ Մանուկյան

Այնպես չէ, որ իշխանության թիմում բոլոր հավաքվածները բոմբժ էին կամ սոված էին, նրանց մի մասը քաղաքական դասընթաց է անցել։ Այս մասին NEWS.am-ի հետ զրույցում նշեց ՀԱԿ փոխնախագահ Արամ Մանուկյանը:

«Ինչի՞ են լռում։ Բոլորը զոմբիացել են, կեսը զոմբի է, վախենում են ձեն հանեն, կեսն էլ վարկեր ունի փակելու: Բա դրանց միջի քաղաքացին ու՞ր է, ու՞ր է դրանց մեջի մտավորականը, կարդացածը, համարձակը, երիտասարդը: Վառեկներին տանում են պաշտոնների են նշանակում, ջահելներին տանում են խորհրդարան, հետո ասում են՝ հետ արի, խախտել ես Սահմանադրությունը, մեկը չի ըմբոստանում»,-ասաց նա:

Դիտարկմանը, որ գուցե պատճառն այն է, որ Նիկոլ Փաշինյանը նրանցից յուրաքանչյուրի վրա կոմպրոմատ ունի, Արամ Մանուկյանն ասաց. «Նախկինների վատ փորձը ինքը սովորեց, նախկիններից ինչքան վատ բան կար, ինքը հավաքեց և կիրառում է շանտաժը, վախը, «խնդրանքը»;

Նա ընդգծեց, որ այս թեմաները պոպուլիստական, ծամոններ են, որոնք գցում են ժողովրդին. «Սիրելի ժողովուրդ, հիմնը, դրոշը, այս ամենը մենք վերցրել ենք ոչ թե որպես գեղարվեստական արժեքներ, դա վերցրել ենք որպես պատմական արժեքներ: Ալենի խելքին սա չի հասնում, ես ի՞նչ անեմ, Ինչքա՞ն ասեմ, որ խելքը հասնի, որ դա կարևոր բան է։

Հռչակագրի մասին։ Այս կարգի սրբագույն փաստաթուղթը, որը պետության ծնունդ է, ասում եք՝ պետության  չգոյության մասին է: Ինչպիսի՞ լկտիություն պետք է ունենաս, ինչքան ամբարտավան պետք է լինես, ինչքան ցինիկ պետք է լինես, որ քո երկրի ծննդականը համարես երկրի չգոյության պայման։ Եվ մարդ շվարում է, մոլորում է, ինչպե՞ս կարելի է այս տգիտության դեմը առնել։ Տգիտությունը ավելի հզոր զենք է, քան բանակը։

Մեր խնդիրն է հասարակությանը հասկացնել, որ այս ո՞ւմ եք ընտրել, հայ ժողովուրդ, ձեր թքած թուքը մի օր լիզելու եք, թե չէ։ Մի օր ինքներդ ձեր խղճի առաջ նստելու եք ասել՝ այս ի՞նչ եմ արել, այս ում բերեցինք, այս ի՞նչ չարիք բերեցինք մեր երկրի գլխին։ Մի՞թե այսպես փորձանքը կարող է ղեկավարել երկիրը»,- հայտարարեց Արամ Մանուկյանը, որը 1990-ին ընթերցել է Անկախության հռչակագիրը: