Մոսկվայի հետ պայմանագիր ստորագրելուց հետո Իրանը «հաստատեց», որ Ռաիսին ահաբեկչության ժամանակ չի զոհվել
- 18:58 18.01.2025
Իրանի Զինված ուժերի Գլխավոր շտաբի հաղորդակցության կենտրոնն այսօր տարածած հայտարարության մեջ հերքում է վերջին շրջանում հնչող այն պնդումները, թե իսլամական հանրապետության նախկին նախագահ Էբրահիմ Ռայիսիի ուղղաթիռի վթարը դիվերսիայի հետևանք էր։
«Վթարի պատճառներն էին եղանակային վատ պայմաններն ու բարդ տեղանքը», – պնդում են իրանցի զինվորականները։
«Համապարփակ հետաքննությունը կողմնակի միջամտության, այդ թվում՝ ահաբեկչական հարձակման, պայթյունի, դիվերսիայի կամ էլեկտրոնային պայքարի միջոցների կիրառման որևէ փաստ չի հայտնաբերել», – նշված է Իրանի Զինված ուժերի Գլխավոր շտաբի հայտարարության մեջ։
Երեկ Իրանի և Ռուսաստանի նախագահները Մոսկվայում պայմանագիր ստորագրեցին, որից անմիջապես հետո Գլխավոր շտաբը որոշեց ևս մեկ անգամ «հաստատել», որ նախագահ Ռաիսին մահացել է մառախուղի պատճառով, և ոչ ավելին։
Հիշեցնենք, որ Իրանի քաղաքական և փորձագիտական շրջանակներում տարբեր վարկածներ են քննարկվում Ալիևի հետ հանդիպումից վերադարձող Ռաիսիի մահվան վերաբերյալ։ Նրանք ակնարկում են ոչ միայն ադրբեջանական ու իսրայելական, այլեւ ռուսական միջամտության մասին։ Հիշեցնենք, որ վերջին ռուս զինվորականներն Արցախից, այդ թվում՝ Իրանին սահմանակից շրջաններից դուրս են բերվել միայն 2024 թվականի հունիսին։ Մինչ այդ ժամանակ գործում էր նաեւ Ակնայում ռուս-թուրքական “մոնիտորինային” կենտրոնը։