Փաշինյանը չպատասխանեց, թե ինչո՞ւ են դեմ Շվեյցարիայում Արցախի հարցով համաժողովի անցկացմանը
- 14:47 31.01.2025
Այսօր հրավիրած ասուլիսում Նիկոլ Փաշինյանը խուսափեց պատասխանել հարցին, թե ինչո՞ւ են Հայաստանի իշխանությունները դեմ, որպեսզի Շվեյցարան Արցախի հարցով միջազգային խաղաղության համաժողով կազմակերպի։
Ավելի վաղ այս հարցին ի պատասխան ՀՀ ԱԳ նախարար Արարատ Միրզոյանը պատասխանել էր, որ չի հասկանում, թե ինչի մասին է խոսքը։ Նույն պատասխանն այսօր տվեց Փաշինյանը։ «Հարցի հետ չեմ առնչվել, պատասխան չունեմ, չեմ էլ պատկերացնում, թե ինչի մասին է խոսքը։ Ես այդ թեմայի հետ առաջին անգամ եմ առնչվում, գուցե գրավոր ընթացակարգով այդ հարցին պատասխանեմ»,- ասաց Փաշինյանը։
Հիշեցնենք, որ անցած տարվա դեկտեմբերին Շվեյցարիայի Դաշնային խորհուրդը 96 կողմ, 80 դեմ եւ 16 ձեռնպահ ձայների հարաբերակցությամբ ընդունել է բանաձեւ, որը երկրի կառավարությանը կոչ է անում 2025 թ. հրավիրել միջազգային խաղաղության համաժողով՝ որտեղ պետք է քննարկվեր «Լեռնային Ղարաբաղի հայերի անվտանգության և հավաքական վերադարձի իրավունքին» վերաբերող հարցեր։
Հարցի քննարկման ժամանակ, ելույթ ունենալով խորհրդարանում, Շվեյցարիայի ԱԳ նախարար Ինյացիո Կասիսը բառացի հայտարարել էր. «Ոչ Հայաստանը, ոչ Ադրբեջանը չեն ցանականում այս համաժողովի անցկացումը»։
Ռոզա Հովհաննիսյան