Իսրայելը մտադիր է ամբողջությամբ գրավել Գազայի հատվածը
- 18:48 19.05.2025
Իսրայելի վարչապետ Բենիամին Նեթանյահուն հայտարարել է, որ Իսրայելը մտադիր է վերահսկողություն հաստատել ամբողջ Գազայի հատվածի նկատմամբ։ Այս մասին նա ասել է իր Telegram ալիքում երկուշաբթի՝ մայիսի 19-ին, հրապարակված տեսաուղերձում։
«Ընթանում են լարված մարտեր, մենք առաջ ենք շարժվում։ Մենք կվերահսկենք ամբողջ շրջանը։ Բայց դա անելու համար մենք պետք է այնպես գործենք, որ ոչինչ չկարողանա մեզ կանգնեցնել», – ընդգծեց Նեթանյահուն։ Նրա խոսքով՝ բանակը ստիպված կլինի պահպանել կարգուկանոնը Գազայում և, մասնավորապես, կանխել մարդասիրական օգնության թալանը։
Գազայի հատվածն արդեն ավերակների է վերածվել, որտեղ դեռևս ապրում է մեկ միլիոնից ավելի մարդ։ Վերջին տարիներին ագրեսորները ընտրել են լիակատար ոչնչացման ուղին՝ սա է տեղի ունենում Գազայում, Ուկրաինայում, Արցախում։ Այս մեթոդը ոչ մի դեպքում չի դատապարտվել միջազգային հանրության կողմից։ Ավելին, աշխարհը կոչ է անում օրինականացնել բնիկ բնակչության լիակատար տեղահանությունը Արցախից։