Թրամփը հայտարարել է, որ Իսրայելը համաձայնել է Գազայում 60-օրյա զինադադարի
- 09:59 02.07.2025
BBC
ԱՄՆ նախագահ Դոնալդ Թրամփը հայտարարել է, որ իսրայելական կողմը Վաշինգտոնի ներկայացուցիչների հետ հանդիպման ժամանակ համաձայնել է Գազայի հատվածում երկամսյա հրադադարի համար անհրաժեշտ պայմաններին։
«Այսօր իմ ներկայացուցիչները երկար և արդյունավետ հանդիպում ունեցան իսրայելցիների հետ Գազայի հարցի շուրջ։ Իսրայելը համաձայնել է 60-օրյա հրադադարի համար անհրաժեշտ պայմաններին, որի ընթացքում մենք կաշխատենք բոլոր կողմերի հետ՝ պատերազմը դադարեցնելու համար», – գրել է նա իր Truth Social սոցիալական ցանցում՝ առանց մանրամասնելու, թե որոնք են այդ պայմանները։
Ամերիկացի առաջնորդի խոսքով՝ Կատարի և Եգիպտոսի ներկայացուցիչները, որոնք «շատ են աշխատել խաղաղություն հաստատելու համար», վերջնական առաջարկը կփոխանցեն Համասի զինյալներին։
«Ես հույս ունեմ, որ Մերձավոր Արևելքի բարօրության համար Համասը կընդունի այս համաձայնագիրը, քանի որ իրավիճակը չի լավանա, այլ միայն կվատանա», – հավելել է Թրամփը։