Մոսկվան զգուշացրել է Հայաստանին, բայց ոչ Սամվել Կարապետյանի հաշվով
- 09:24 08.07.2025
Ռուսաստանի արտաքին գործերի փոխնախարար Միխայիլ Գալուզինը ՀՀ դեսպան Գուրգեն Արսենյանի հետ զրույցում նրան է փոխանցել Հայաստանում Ռուսաստանի մասին կառուցողական լրատվական ֆոն պահպանելու անհրաժեշտության, ինչպես նաև Մոսկվայի և Երևանի միջև ապագա շփումների վերաբերյալ «համաժամեցված հսկողություն» իրականացնելու դիրքորոշումը, հաղորդում է Ռուսաստանի արտաքին գործերի նախարարությունը։
«Քննարկվել են երկկողմ և տարածաշրջանային օրակարգի մի շարք հարցեր։ Զրույցի ընթացքում դիվանագիտական առաքելության ղեկավարին փոխանցվել է Հայաստանում Ռուսաստանի և երկկողմ հարաբերությունների շուրջ կառուցողական տեղեկատվական ֆոն պահպանելու անհրաժեշտության դիրքորոշումը», – ասվում է երկուշաբթի օրը դիվանագետների հանդիպման մասին հաղորդագրության մեջ։
Պաշտոնական տեղեկատվության մեջ չի ասվում, որ Ռուսաստանը պահանջել է արդար հետաքննություն անցկացնել ռուս միլիարդատեր Սամվել Կարապետյանի նկատմամբ, որը 10 օր կալանքի տակ է։
Ռուսաստանի արտաքին գործերի նախարարությունը, ըստ էության, կանչել է Հայաստանի դեսպանին ոչ ի պաշտպանություն Կարապետյանի կամ նրա «Հայկական էլեկտրական ցանցեր» ընկերության, որը Հայաստանի խորհրդարանը թույլատրել էր ազգայնացնել։
Ռուսաստանի արտաքին գործերի նախարարությունը մտահոգված է Մոսկվայի «իմիջի» խնդրով. օրերս պաշտոնական Երևանը, Արտաքին գործերի նախարարության մակարդակով, մեղադրել է ռուսական լրատվամիջոցներին Հայաստանի ներքին գործերին միջամտելու մեջ։
Ավելի վաղ Հայաստանի խորհրդարանի խոսնակ Ալեն Սիմոնյանը հայտարարել էր, որ ժամանակն է լրջորեն քննարկել ռուսական հեռուստաալիքների հեռարձակումը հայկական մուլտիպլեքսում դադարեցնելու հարցը։
Միևնույն ժամանակ, հայկական լրատվամիջոցները գրում են, որ Սամվել Կարապետյանի թիմն արդեն սկսել է ստեղծել նոր քաղաքական կուսակցություն և սեփական տեղեկատվական ալիք։