Ասկերանում բողոքի ակցիայի մասնակիցները թույլ չեն տվել ռուսական բեռնատարներին անցնել Ակնա
- 21:00 30.08.2023
Մի քանի ժամ առաջ Ասկերանում բողոքի ակցիայի մասնակիցները հայտնել են, որ Արցախի տարածքից ռուսական խաղաղապահների մի քանի բեռնատարներ փորձում են շարժվել դեպի Ակնա (Աղդամ), որտեղ կայանված են ադրբեջանական բեռնատարները։ Ակտիվիստները կասկածել են, որ ռուս խաղաղապահները գնացել են ադրբեջանական բեռնատարների մոտ՝ իրենց մեքենաներով բեռները բերելու Արցախ։
Դավիթ Կ.-ի խոսքով՝ եղել է հինգ ռուսական բեռնատար և մեկ ուղեկցորդ։ Բեռնատարներին թույլ չեն տվել անցնել և նրանք ստիպված են եղել վերադառնալ բազա:
Ակցիայի մեկ այլ մասնակից Հովիկ Ե.-ն հայտարարեց, որ թույլ չեն տվել ռուսական բեռնատարների անցումը. «Ռուսական բեռնատարները վերադարձել են։ Մենք բաց չենք թողել։ Որովհետև մենք այստեղ կանգնած ենք ոչ թե 9 ամիս մեզ սովամահ արած թշնամուց ողորմություն վերցնելու, այլ նրա համար, որ պաշտպանում ենք մեր իրավունքը մեր հողի, խաղաղ կյանքի ու ազատության նկատմամբ»։