Եվրոպայի խորհրդի ղեկավարը Սրբուհի Գալյանից հարցրեց ղարաբաղցիների մասին
- 10:22 22.10.2025
Ստրասբուրգում կայացել է ՀՀ արդարադատության նախարար Սրբուհի Գալյանի հանդիպումը Եվրոպայի խորհրդի գլխավոր քարտուղար Ալեն Բերսեի հետ:
Ինչպես ֆեյսբուքյան իր էջում գրել է հայ նախարարը, “միասին քննարկեցինք կարևոր հարցեր, նաև սահմանադրական բարեփոխումների ընթացքը»:
Կարելի է երևակայել, թե ինչպես են ընթացել “սահմանադրական բարեփոխումների” մասին քննարկումները․
-Տիկին Գալյանի, ի՞նչն եք ուզում բարեփոխել Սահմանադրության մեջ։
-Դեռ չգիտենք, բայց հաստատ ուզում ենք փոխել։
-Կարո՞ղ է ուզում եք Անկախության հռչակագրի հղումը հանել սահմանադրությունից։ Չէ՞ որ Ալիևը դրանից է դժգոհ, ասում է՝ ըստ ՀՀ Սահմանադրության՝ Ղարաբաղը Հայաստանի մաս է։
-Ի՞նչ եք ասում, դա այդպես չէ։ Հատկապես, որ ներկայիս Սահմանադրության նախաբանը իրավունք չունենք փոխել, դրա համար ուղղակի նոր Անկախություն և հանրապետություն կհռչակենք և նոր Սահմանադրություն կընդունենք։ Կար Ղարաբաղը, չկա Ղարաբաղը։
-Իսկ ինքնորոշման իրավո՞ւնքը։ Չէ՞ որ ձեր ներկայիս Անկախության հռչակագիրը հիմնված է 1989 թ․ Ղարաբաղի և Հայաստանի վերամիավորման որոշման վրա, որը ողջյունել է ամբողջ քաղաքակիրթ աշխարհը։
-Դե, ժամանակները փոխվել է, հիմա ուժի իրավունքն առավելություն ունի՝ մենք պարտվել ենք, Եվրոպան էլ ասում է՝ աշխարհի ամենակարևոր փաստաթուղթը՝ Ալմա-Աթայի հռչակագիրն է։
-Հաա, ճիշտ է, մոռացել էի։ Դե, հաջողություն եմ ձեզ մաղթում, չմոռանաք նոր Սահմանադրության մեջ նշեք նաև Կավբյուորյի որոշումը։ Ի դեպ, ղարաբացիները ո՞նց են։
-Ինչ ղարաբաղցի, նրանք հիմա ՀՀ հպարտ քաղաքացիներ են, ճիշտ է՝ անտուն, անգործ, բայց այդ հարցով Հայաստանում դիսկրիմինացիա չկա՝ բոլորն էլ կարող են անտուն և անգործ մնալ։
-Փաստորեն, շատ հաջող պայքարում եք դիսկրիմինացիայի դեպ։ Ապրեք։