Փաշինյանը` թոշակների բարձրացման, բուժապահովագրության և քյասիբության մասին
- 15:09 27.10.2025
Ազգային ժողովում «ՀՀ 2026 թվականի պետական բյուջեի մասին» օրենքի նախագծի քննարկման ժամանակ Նիկոլ Փաշինյանը հայտարարեց․ «Անկանխիկ եղանակով թոշակառուների ծախսերի հետվերադարձի համակարգը զարգանալու է և 2026 թվականին հասնելու է 20%-ի ներկայիս 12%-ի փոխարեն։ Սա, ըստ էության, թոշակի բարձրացում է։
Հաջորդը, մենք այս տարին ներդնելու ենք համընդհանուր հետվճարի համակարգ. անկախ առևտրի երկու տոկոսը քաղաքացիները հետվճարի ձևով կստանան”։
Ամենակարևոր նորություններից մեկը նա համարեց այն, որ 2026–ին կներդրվի առողջապահության համընդհանուր ապահովագրության համակարգը, և 2026 թվականին ըստ էության քաղաքացիները դրա հետ կապված որևէ ծախս չեն նկատի, որովհետև ծախսերը ամբողջը կանի կառավարությունը ադապտացիոն էս շրջանում։
«Բայց նաև հետագայում կառավարությունը նախատեսում է, որ պետք է ապահովվի մինչև 18 տարեկան երեխաների, 65 պլյուս տարիքի թոշակառուների, նաև որոշակի սոցիալական խմբերի առողջապահության ապահովագրությունը”։
Հայաստանում աղքատությունը մնում է մոտավորապես 23%, և այս ցուցանիշը վերջին տարիներին էապես չի նվազել, ասել է Նիկոլ Փաշինյանը։ «Ես եզրակացրել եմ, որ պատճառը մեր քայքայվող դպրոցներն են», – հայտարարել է նա։
Փաշինյանի խոսքով, ՀՀ-ում շատ բիզնեսներ չեն կարողանում գտնել աշխատողներ, այդ թվում՝ բարձր վարձատրվող ոլորտներում։ Փաշինյանը կարծում է, որ այն մարդիկ, ովքեր պետք է զբաղեցնեին այդ աշխատատեղերը, չեն ստացել համարժեք կրթություն։ Դրա համար Ակադեմգորոդոկի և դպրոցների կառուցումը կշարունակվի։