ԱՄՆ-Իրան բանակցությունները ձախողվեցին, պատերազմը կշարունակվի – Axios
- 09:10 30.09.2026
Կատարի ջանքերը՝ ԱՄՆ-ի և Իրանի միջև խաղաղություն հաստատելու համար, այս շաբաթ քիչ առաջընթաց են արձանագրել: Axios-ի տվյալներով՝ երկու կողմերն էլ պատրաստ չեն փոխադարձ զիջումների գնալ, և բանակցությունները փակուղի են մտել։
Երկուշաբթի օրը կատարցի միջնորդ Ալի ալ-Թավադին Նյու Յորքում հանդիպել է Իրանի արտաքին գործերի նախարար Աբբաս Արաղչիի և նրա թիմի հետ: Նրանք քննարկել են Կատարի երկէջանոց առաջարկը, որը, ըստ աղբյուրների, նախատեսված էր բավարարելու Իրանի պահանջը՝ ԱՄՆ ռազմածովային շրջափակումը վերացնելու և ԱՄՆ-ի պահանջը՝ Թեհրանից միջուկային զիջումներ կատարելու վերաբերյալ։
Ալ-Թավադին ավելի ուշ Վաշինգտոնում բանակցություններ է վարել Դոնալդ Թրամփի դեսպան Ջարեդ Քուշների և այլ ամերիկացի պաշտոնյաների հետ: Հանդիպման մի մասին մասնակցել է նաև ԱՄՆ փոխնախագահ Ջ.Դ. Վենսը։
Ավելի վաղ ամերիկացի պաշտոնյաները բանակցությունները անվանել են «դրական և կառուցողական» և հայտարարել, որ Իրանը ճկունություն է ցուցաբերել միջուկային հարցում: Հաղորդվում էր, որ Թրամփը ևս պատրաստ էր մեղմել պատժամիջոցները և ապասառեցնել իրանական միջոցները՝ միջուկային ծրագիրը կրճատելու դիմաց:
Սակայն Թրամփը ավելի ուշ սոցիալական ցանցերում հայտարարել է, որ Իրանին ոչինչ չի առաջարկել: Axios-ի աղբյուրներից մեկը բանակցություններից հետո հայտնել է, որ էական առաջընթաց չի գրանցվել: Նա ասաց, որ Իրանը պահանջում է զիջումներ, որոնք Միացյալ Նահանգները պատրաստ չէ անել, մինչդեռ Վաշինգտոնը կարծում է, որ ունի ուժեղ դիրքորոշում և զիջումների գնալու կարիք չունի։