Լավրովը կրկին «փակեց» Ղարաբաղի հարցը Փաշինյանով

Նախագահ Պուտինն անձամբ որոշիչ դեր է խաղացել այն հարցում, թե ինչպես հնարավոր եղավ դադարեցնել պատերազմը 2020 թվականի նոյեմբերին:

Այս մասին հայտարարել է ՌԴ ԱԳ նախարար Սերգեյ Լավրովը ՄԱԿ-ի Անվտանգության խորհրդի միջոցառումներին մասնակցության արդյունքներին հաջորդած մամուլի ասուլիսում։

«Ի դեպ, 2022 թվականին Պրահայում վարչապետ Փաշինյանը փաստաթուղթ է ստորագրել, որով ճանաչում է Ադրբեջանի տարածքային ամբողջականությունը 1991 թվականի սահմաններում։ Սա նշանակում է, որ ԼՂԻՄ-ը, ինչպես այն ժամանակ անվանում էին Ղարաբաղը, Ադրբեջանի անբաժանելի մասն է»,- ասել է Լավրովը։

«Սա մեզ համար անակնկալ էր, քանի որ մինչ այս քննարկվում էին Ղարաբաղի կարգավիճակի խնդրի վերջնական լուծման տարբեր տարբերակներ։ Հայաստանի վարչապետը դա արել է ինքնուրույն։ Դրանից հետո կարգավիճակի հարցը, եւ թե ինչ է Ղարաբաղը, փակված է»,- ասաց նա։

Հիշեցնենք, որ երեկ Հայաստանի արտգործնախարար Արարատ Միրզոյանը, փաստորեն, ասել էր, որ Փաշինյանը Պրահայում հայտարարություն է արել այն բանից հետո, երբ Ռուսաստանը հայտարարել է, որ չի ճանաչում Բաքվի ագրեսիան և հայկական տարածքների օկուպացումը 2022 թվականի սեպտեմբերին, եւ օգնություն չի ցուցաբերում, քանի որ Հայաստանի սահմանները որոշված չեն։