Ֆրանսիայում ընտրությունների երկրորդ փուլն է

Ազատություն

Ֆրանսիայում այսօր անցկացվում է խորհրդարանական ընտրությունների երկրորդ փուլը: Լրատվամիջոցները հաղորդում են, որ ընտրական տեղամասերը բացվել են և քվեարկություն է ընթանում:

Ընտրությունների այս փուլով վճռվելու է Ազգային ժողովի 577 տեղերից 501-ի հարցը: Քվեարկությամբ պարզ կդառնա նաև, թե ով է լինելու երկրի հաջորդ վարչապետը:

Հունիսի 30-ին անցկացված առաջին փուլի արդյունքներով՝ առաջատարն է Մարին Լը Պենի և Ժորդան Բարդելայի «Ազգային միավորում»-ը՝ ձայների ավելի քան 33 տոկոսով, երկրորդը ձախակողմյան «Նոր ժողովրդական ճակատ» դաշինքն է՝ 28 տոկոսով։ Նախագահ Էմանյուել Մակրոնի կենտրոնամետ կուսակցությունը ստացել է 20 տոկոս՝ հայտնվելով երրորդ հորիզոնականում։

Առաջին փուլի արդյունքներով խորհդարանի միայն 76 տեղերի դեպքում է թեկնածուներին հաջողվել ստանալ ձայների 50 տոկոսից ավելին ու հաղթել հենց առաջին փուլում։ Մյուս դեպքերում երկրորդ փուլ են անցել երկու և անգամ երեք թեկնածուներ, և միայն երկրորդ փուլում պարզ կդառնա՝ արդյոք աջ ծայրահեղականները կստանան բացարձակ մեծամասնություն։ Այդ դեպքում Մակրոնը ստիպված կլինի վարչապետ նշանակել քաղաքական հակառակ բևեռի ներկայացուցիչ 28-ամյա Բարդելային:

Ֆրանսիայի նախագահը արտահերթ խորհրդարանական ընտրություններ նշանակեց անցած ամիս, երբ աջ ծայրահեղականները տպավորիչ հաղթանակ տոնեցին Եվրախորհրդարանի ընտրություններում: