ՔՊ-ն հավատում է․ «Բաքվի ագրեսիայի որեւէ առիթ, պատճառ ու լեգիտիմություն չկա»
- 14:50 17.06.2025
«Ադրբեջանը չունի հիմնավոր պատճառ եւ լեգիտիմություն՝ Հայաստանի վրա որեւէ կերպ ագրեսիա սկսելու համար»,- այսօր լրագրողների հարցին ի պատասխան ասաց ՔՊ-ական պատգամավոր, ԱԺ արտաքին հարաբերությունների մշտական հանձնաժողովի նախագահ Սարգիս Խանդանյանը։
Լրագրողները հետաքրքվեցին՝ Իրանի եւ Իսրայելի միջեւ պատերազմի ռիսկերը Հայաստանի համար գնահատվո՞ւմ են, վտանգ կա՞, որ Ադրբեջանը, օգտվելով ստեղծված իրավիճակից, կարող է հարձակվել Հայաստանի վրա՝ փորձելով տիրանալ Սյունիքին։
«Նման ագրեսիայի որեւէ առիթ, պատճառ ու լեգիտիմություն չկա»,- հայտարարեց ՔՊ-ականը։
Լրագրողների հարցին, որ 2022 թվականին Ադրբեջանը հարձակվել է ՀՀ վրա ու մի շարք տարածքներ օկուպացրել, նա պատասխանեց, որ 2022-ին եւ 2025 թվականին անվտանգային միջավայրը բոլորովին տարբեր են։
«Եվ, բացի այդ, հիշեցնեմ, որ Հայաստանն ու Ադրբեջանն ունեն պատրաստի խաղաղության պայմանագրի տեքստ, որը Հայաստանը պատրաստ է ստորագրել այսօր»։
Լրագորղները հիշեցրին, որ Ադրբեջանը հրաժարվում է ստորագրել ու խոսել խաղաղության մասին, նա պատասխանեց․ «Ադրբեջանի դիրքորոշման մասին գիտեք, բայց Հայաստանն աշխատում է եւ շարունակում է բանակցություններ ու քննարկումներ իրականացնել՝ խաղաղության պայմանագրի ստորագրումը հնարավորինս մոտեցնելու համար»։
Սարգիս Խանդանյանը չհաստատեց եւ չհերքեց տեղեկությունը, թե Նիկոլ Փաշինյանն այցելելո՞ւ է Թուրքիա եւ հանդիպելո՞ւ է Էրդողանի հետ։ «Ես կարծում եմ՝ վարչապետի այցերի եւ դրանց օրակարգի վերաբերյալ մեկնաբանությունները ճիշտ կլինի, որ վարչապետի աշխատակազմը տա»։