Արցախի նախագահի թեկնածություններ չկան

«Հրապարակ» թերթը գրում է․ Արցախի Ազգային ժողովում պատգամավորները չեն կողմնորոշվում ինչ անել` նորի՞ց ԱԺ նախագահ ընտրել, թե՞ ձեռնպահ մնալ` դրանով ակամայից ջուր լցնելով Փաշինյանի ջրաղացին, որը հետեւողականորեն ոչնչացնում է այս ինստիտուտը։

Մեզ ասացին, որ վերջին օրերին ակտիվ քննարկումներ են, Աշոտ Դանիելյանի անսպասելի հրաժարականից հետո բոլորը շոկի մեջ են։ ԱԺ նախագահի ժամանակավոր պաշտոնակատարը Գագիկ Բաղունցն է, ԱԺ նոր նախագահի ընտրության համար 17 պատգամավորի կողմ քվե է պետք, ինչն ապահովել հնարավոր չէ։

Հուլիսի 2-ին, հիշեցնենք, Աշոտ Դանիելյանը հայտարարեց, որ որոշում է կայացրել հրաժարվել Արցախի Հանրապետության ԱԺ նախագահի պաշտոնից։ Ըստ Արցախի սահմանադրության՝ Դանիելյանը նաեւ Արցախի նախագահի պարտականություններն էր կատարում, քանի որ Արցախի ԱԺ խմբակցություններն Արցախի նախագահի թեկնածու չէին առաջադրել 2025-ին։

Նրա հրաժարականի պատճառն «Արցախֆրուտ» ՓԲԸ-ին առնչվող դրամական միջոցների շարժն է։ Աշոտ Դանիելյանը հայտնել է, որ «Արցախֆրուտ» ՓԲԸ-ից որոշակի դրամական միջոցներ փոխանցվել են իրեն՝ որպես ԱԺ նախագահի, բացառապես պաշտոնեական գործունեության ապահովման եւ դրանից բխող ծախսերի իրականացման նպատակով։

Առայժմ որեւէ թեկնածուի անուն չկա, մեր աղբյուրի խոսքով՝ դժվար է լինելու ինչ-որ մեկին համոզել, քանի որ ով համաձայնի, կհայտնվի Փաշինյանի թիրախում, գրում է Հրապարակը։

«Արցախի ԱԺ-ն քննարկումներ է անում, սպասենք տեսնենք ինչ-որ թեկնածուի շուրջ կոնսենսունս կլինի՞»,- «Փաստինֆո»-ի հետ զրույցում ասաց Արցախի պետնախարար Նժդեհ Իսկանդարյանը։