Արցախբանկը չի պատասխանել մանկական ավանդների մասին Արցախի ներկայացուցչության հարցերին

«Հարգելի՛ հայրենակիցներ,

Վերջին շրջանում Արցախի Հանրապետության ներկայացուցչություն են դիմում քաղաքացիներ՝ կապված Արցախի Հանրապետության կառավարության որոշմամբ նախատեսված՝ մինչև 2019 թվականի հունվարի 1-ը ընտանիքում ծնված յուրաքանչյուր երրորդ և հաջորդ երեխայի անվամբ «Արցախբանկ» ՓԲԸ-ում բացված նպատակային ավանդների գումարների տրամադրման հնարավորության հետ։

Խոսքը ԱՀ կառավարության 2023 թվականի դեկտեմբերի 30-ի N 31-Ն որոշմամբ սահմանված կարգավորման մասին է, որով փոփոխություններ և լրացումներ են կատարվել ԱՀ կառավարության 2019 թվականի ապրիլի 17-ի N 237-Ն որոշման մեջ։

Համապատասխան կարգավորմամբ նախատեսվում է, որ մինչև 2019 թվականի հունվարի 1-ը ընտանիքում ծնված երրորդ և հաջորդ երեխայի անվամբ «Արցախբանկ» ՓԲԸ-ում բացված նպատակային ժամկետային ավանդի գումարը տրամադրվում է ավանդատուին, իսկ մինչև 18 տարին լրանալը՝ նաև վաղաժամկետ ստանալու պահանջ ներկայացրած երեխայի ծնողին կամ խնամակալին։

Սակայն քաղաքացիների բարձրաձայնած խնդիրներից և մեր ունեցած տեղեկություններից պարզ է դառնում, որ նշված կարգավորումը գործնականում չի իրականացվում․ մինչ օրս քաղաքացիների ներկայացրած որևէ դիմում բանկի կողմից չի բավարարվել։

Հաշվի առնելով արցախահայության ներկայիս ծանր սոցիալական իրավիճակը՝ Արցախի Հանրապետության ներկայացուցչությունը պաշտոնական հարցմամբ դիմել է «Արցախբանկ» ՓԲԸ-ին՝ խնդրելով ներկայացնել, թե ինչ իրավական և փաստական հիմքերով չի իրականացվում ավանդների գումարների տրամադրման գործընթացը, ինչպես նաև հայտնել բանկի հստակ դիրքորոշումը կառավարության համապատասխան որոշմամբ սահմանված կարգավորման վերաբերյալ։

Մինչ օրս ներկայացուցչության հարցմանը «Արցախբանկ»-ի կողմից որևէ պատասխան չի տրամադրվել։

Նշենք նաև, որ սա «Արցախբանկ»-ի հետ մեր առաջին շփումը չէ։

Ներկայացուցչության և բանկի ներկայացուցիչների միջև տարբեր փուլերում տեղի են ունեցել հանդիպումներ, որոնց ընթացքում քննարկվել են արցախցիներին հուզող մի շարք խնդիրներ և ներկայացվել համապատասխան առաջարկություններ։ Մասնավորապես, անդրադարձ է կատարվել բռնի տեղահանված մեր հայրենակիցների բնակապահովման, սոցիալական վիճակի բարելավման, ֆինանսական խնդիրների և ստեղծված պայմաններում բանկի կողմից հնարավոր աջակցության այլ ուղղություններին։

Մենք բազմիցս ընդգծել ենք, որ ստեղծված իրավիճակում հատկապես կարևոր է բոլոր հնարավոր ռեսուրսների համադրումը և արցախցիների խնդիրների լուծմանն ուղղված գործնական քայլերի իրականացումը։

Այս հրապարակման նպատակը որևէ կառույցի կամ անձի թիրախավորումը կամ քաղաքացիների շրջանում անհարկի լարվածություն ստեղծելը չէ։ Մենք ակնկալում ենք, որ «Արցախբանկ»-ը կարձագանքի բարձրացված հարցերին, կներկայացնի իր հստակ իրավական դիրքորոշումը և կգնահատի այն հնարավոր քայլերը, որոնք կարող են իրական աջակցություն ապահովել այսօր ծանր սոցիալական պայմաններում գտնվող արցախահայությանը։