Իրավիճակն Արցախում իսկապես կրիտիկական է, և այս ֆոնին ուզում եմ անդրադառնալ բլոգերի մակարդակին իջած Նիկոլ Փաշինյանի ասուլիսում անընդունելի հայտարարություններին։ Այս մասին այսօրվա ուղիղ եթերում ասել է Արցախի նախագահին առընթեր Հակաճգնաժամային խորհրդի ղեկավար Տիգրան Պետրոսյանը։
Սկսեմ նրա հայտարարությունից, որ Լաչինի միջանցքը հանձնվել է առանց Հայաստանի համաձայնության։ Միգուցե չի գիտակցում, բայց սա չափազանց լուրջ մեղադրանք է, նա, ըստ էության, ասում է, որ առանց Հայաստանի իմացության մի ամբողջ շրջան է հանձնվել։ Իրավապահ մարմինները պետք է արձագանքեն նման հայտարարությանը եւ պարզեն, թե ով է հանձնել Լաչինը։ Որովհետև Արցախի իշխանություններն ասում են, որ ռուսները մեզ ստիպել են, իսկ մենք պարզապես ստիպված ենք եղել փրկել տեղի բնակչությանը։ Ռուսներն ասում էին, որ եթե հայերը չհեռանան, ռուսներն իրենք կհեռանան միջանցքից։ Սա պետք է պարզել։
Ինչ վերաբերում է դասալիքների մասին հայտարարությանը. դուք լավ գիտեք, թե Արցախից ու Հայաստանից քանի մարդ է զոհվել և ինչ համամասնությամբ։ Արցախում մեկ շնչին բաժին ընկնող մահացության դեպքերն բազմապատիկ շատ են։ Մարդիկ ոչ թե լքեցին, այլ տարհանեցին իրենց ընտանիքները, քանի որ այն մարդիկ, ում հետ դուք սելֆի եք արել՝ Բակո Սահակյանը և մյուսները, նախապես կացարաններ չէին պատրաստել, իսկ մարդիկ թաքնվելու տեղ չունեին։ Իսկ ի՞նչ պետք է անեին։ Ես շնորհակալ եմ հայաստանյան մեր հայրենակիցներին, ովքեր տեղավորեցին բոլորին։ Մենք մեկ ազգ ենք, և ոչ ոք իրավունք չունի ատելություն սերմանել։ Ի՞նչ է նշանակում «ղարաբաղյան ակցենտ»։ Իսկ որտեղի՞ց է քո իջեւանյան ակցենտը՝ ղարաբաղյանի նմանությամբ։ Մենք բոլորս մեկ ժողովուրդ ենք։
Փաստորեն, դուք ժողովրդին հենց սկզբից բաժանել եք։ Անգամ երբ ասում էիք, որ Արցախը Հայաստան է։ Ի՞նչ է նշանակում՝ մենք նրանց համար չենք զոհվի։ Ո՞վ է «նրանք» և ով է «դու»-ն։
Զիջումներով խաղաղություն չի ստացվում, այսօր Ղարաբաղ, վաղը Սյունիք, ասաց Տիգրան Պետրոսյանը։
