Ռուսաստանում նախագահական ընտրություններից մեկ ամիս առաջ բանտում մահացավ Պուտինի գլխավոր հակառակորդ Նավալնին

Ալեքսեյ Նավալնին մահացել է Յամալո-Նենեց ինքնավար շրջանի թիվ 3 ուղղիչ գաղութում։ Ուրբաթ հայտնել է Դաշնային պատժիչ ծառայության շրջանային վարչությունը։
«Փետրվարի 16-ին թիվ 3 ուղղիչ գաղութում դատապարտյալ Նավալնի Ա.Ա. զբոսանքից հետո վատ է զգացել իրեն, գրեթե անմիջապես կորցրել գիտակցությունը։ Անմիջապես ժամանել են հիմնարկից բուժաշխատողները, հրավիրվել է շտապօգնության խումբ»,- ասվում է հաղորդագրությունում։
«Կատարվել են բոլոր անհրաժեշտ վերակենդանացման միջոցառումները, սակայն դրական արդյունք չեն տվել։ Շտապօգնության բժիշկները հաստատել են դատապարտյալի մահը։ Մահվան պատճառը պարզվում է»,- ասվում է հաղորդագրության մեջ։