Հաթերքի գյուղապետի երեխաներին թողել են մեքենայի մեջ, իրեն ձերբակալել

Արցախի Հաթերքի գյուղապետ Վարդան Գրիգորյանին ձերբակալելու լուրը հաստատվել է։ Այս մասին Ֆեյսբուքի ուղիղ եթերով ասաց փաստաբան Ռուբեն Մելիքյանը։

«Ցավոք սրտի, հաստատվեց, խոսել եմ գյուղապետի կնոջ հետ, 7, 9 եւ 13 տարեկան երեխաներն ավտոյի մեջ, գալիս են վատ ձեւով, քաշքշելով, ավտոյից դուրս շպրտելով, գետնին պառկեցնելով մարդուն բռնում են։ Երեխեքի վիճակը պատկերացնո՞ւմ եք։ Հորը գցում են գետնին վերջին վատ ձեւով, դա հերիք չէ, մի հատ էլ երեխեքին թողնում են ավտոյի մեջ, գնում են։ Մեկը գրել էր՝ թուրքից վատն են։ Ես չեմ լսել այսպիսի այլանդակություն՝ երեխեքին այսպես թողնել անտերության, հորը տանել։ Լավ, սա ի՞նչ է, սրա համար ինչ-որ մեկը պե՞տք է պատասխան տա»,- ասաց Մելիքյանը։

Նա նշեց, որ շատ դրական են բնութագրում Հաթերքի գյուղապետին՝ իր մարտական ուղիով, իր համարձակությամբ ու գյուղը ղեկավարելու աշխատանքով։