Վրաստանն, այնուամենայնիվ, դուրս մնաց ֆուտբոլի Եվրոպայի առաջնությունից

Ազատություն

Վրաստանի ազգային ընտրանին դուրս մնաց Եվրոպայի առաջնությունից՝ 1/8 եզրափակիչում 1:4 խոշոր հաշվով պարտվելով Իսպանիայի ընտրանուն։

Հանդիպման առաջին գնդակը խփեցին իսպանացիները, սակայն՝ սեփական դարպասը: 18-րդ րոպեին Լե Նորմանի ինքնագոլից մոտ 20 րոպե անց Էրնանդեսը հավասարեցրեց հաշիվը, իսկ 51-րդ րոպեին առաջ անցավ Ֆաբիան Ռուիսի գոլի շնորհիվ:

75-րդ ու 83-րդ րոպեին Ուիլյամսն ու Օլմոն ևս երկու գնդակ ուղարկեցին վրացիների դարպասը:

Նույն փուլում Անգլիայի հավաքականը 2:1 հաշվով հաղթեց Սլովակիայի թիմին։ Այստեղ Սլովակիան բացեց հաշիվը, և անգլիացիներին միայն խաղի հիմնական ժամանակին մրցավարի ավելացրած րոպեների վերջին վայրկյաններին հաջողվեց հավասարեցնել այն, մեկ գոլ էլ նրանք խփեցին հավելյալ ժամանակում։

Քառորդ եզրափակիչում Իսպանիան կհանդիպի մրցաշարը հյուրընկալող Գերմանիայի, Անգլիան՝ Շվեյցարիայի հետ։

Այսօր նախատեսված են 1/8 եզրափակիչի Ֆրանսիա-Բելգիա և Պորտուգալիա-Սլովենիա հանդիպումները, վաղն այս փուլը կավարտվի։

Քառորդ եզափակիչի հանդիպումները կկայանան հուլիսի 5-6-ը, հուլիսի 9-ին և 10-ին կիսաեզրափակիչի խաղերն են, որոնց հաղթողները հուլիսի 14-ն Բեռլինում կհանդիպեն եզրափակիչում։

Վրաստանն առաջին կովկասյան երկիրն է, որը մասնակցեց Եվրոյին: Ընդ որում, հավաքականը կարողացավ դուրս գալ խմբից, պարտվելով Թուրքիային, սակայն ոչ ոքի խաղալով Չեխիայի հետ ու հաղթելով Պորտուգալիային: