ՔՊ-ն խճճվել է․ գնում է ԵՄ, բայց ԵԱՏՄ-ից դուրս չի գալիս
- 14:31 12.02.2025
Ազգային ժողովն այսօր առաջին ընթերցմամբ ընդունեց Եվրոպական միությանը ՀՀ անդամակցելու գործընթացի մեկնարկի մասին օրենքի նախագիծը։ Նախագծին կողմ քվեարկեց միայն «Քաղաքացիական պայմանագիր» խմբակցությունը։ «Հայաստան» եւ «Պատիվ ունեմ» խմբակցությունները բոյկոտել են քվեարկությունը։
Նշենք, որ այս նախագիծը ներկայացրել են արտախորհրդարանական ուժերը՝ քաղաքացիական նախաձեռնության կարգով։ Իշխանության ներկայացուցիչները քննարկումների ժամանակ հայտարարեցին, որ օրենքի ընդունումը չի նշանակում Եվրամիության անդամակցության գործընթաց, ԵՄ հետ պետք է քննարկեն ճանապարհային քարտեզը։
“ԱԺ հարգարժան պատգամավոր Մարիա Կարապետյանի հայտարարությունը, թե «ՀՀ-ն փոխո՞ւմ է իր արտաքին քաղաքական վեկտորը», և ինքն իրեն տրված պատասխանը՝ «ոչ», բացահայտորեն հակասում է Հայաստանի կառավարության վերջին տարիների քաղաքականությանը, գործնական քայլերին և տարածաշրջանային նոր իրողություններին։ Եթե Հայաստանը չի փոխում իր արտաքին քաղաքական վեկտորը, ապա ինչպե՞ս պետք է բացատրել ԵՄ-ի հետ հարաբերությունների աննախադեպ խորացումը, ընդհուպ մինչև DCFTA-ի՝ ԵՄ մաքսային տնտեսական տարածքին միանալու շուրջ բանակցություններ սկսելու պատրաստակամությունը, ինչը անխուսափելիորեն ենթադրում է ԵԱՏՄ-ից դուրս գալ”, գրել է օրինագծի հեղինակներից մեկը՝ Արման Բաբաջանյանը։