Ինչպես են ռուսներն “ազատագրում” Կուրսկը. մեկ շաբաթ գազատարում

Մոտ ժամանակներս Կուրսկի շրջանի տարածքը պետք է ամբողջությամբ ազատագրվի թշնամուց։ Այս մասին հայտարարել է Վլադիմիր Պուտինը, ով մարտի 12-ին ՌԴ ԶՈւ Կուրսկի խմբավորման հրամանատարական կետ է ժամանել բանակային կամուֆլյաժով՝ զինվորական համազգեստով։

ՌԴ զինված ուժերի գլխավոր շտաբի պետ, բանակի գեներալ Վալերի Գերասիմովը երկրի ղեկավարին զեկուցել է, որ հարձակողական գործողությունների ընթացքում ՌԴ ԶՈւ-ն ազատագրել է Կուրսկի սահմանային գոտում ավելի քան 1100 քառակուսի կիլոմետր տարածք, այսինքն՝ նախկինում հակառակորդի կողմից գրավված տարածքի ավելի քան 86%-ը։ Նա նաեւ հայտնել է, որ ռուս զինծառայողները գերի են վերցրել 430 ուկրաինացի զինվորի, իսկ Ուկրաինայի զինված ուժերը նահանջում են։

Ուկրաինայի Զինված ուժերի գլխավոր հրամանատար Ալեքսանդր Սիրսկին հայտարարել է Կուրսկի շրջանից ուկրաինական զորքերի մասնակի դուրսբերման մասին։ «Իմ առաջնահերթությունը եղել և մնում է ուկրաինացի զինվորների կյանքը փրկելը։ Այդ նպատակով ՊԲ ստորաբաժանումները, անհրաժեշտության դեպքում, հետ են շարժվում դեպի առավել շահավետ դիրքեր։ Առաջին հերթին օգտագործվում է անօդաչու բաղադրիչը, ինչպես նաև հրետանային կրակային զենքեր։ Ես դրա համար տվել եմ բոլոր անհրաժեշտ հրամանները»,- չորեքշաբթի օրը՝ մարտի 12-ին, գրել է Սիրսկին Facebook-ում։

Գեներալը հայտնել է, որ ակտիվ ռազմական գործողությունները շարունակվում են Կուրսկի ուժերի խմբավորման օպերատիվ գոտում՝ Սուջայի արվարձաններում և նրա շրջակա տարածքներում։ Գերագույն գլխավոր հրամանատարի խոսքով՝ հակառակորդը փորձում է ուկրաինական ուժերը դուրս մղել Ռուսաստանի Դաշնության տարածքից և ռազմական գործողությունները տեղափոխել Ուկրաինայի տարածք՝ Սումիի և Խարկովի շրջաններ։

«Վոստոկ» դիվերսիոն, հետախուզական և գրոհային բրիգադի հրամանատարը բացահայտել է Պոտոկ («Խողովակ») գործողության մանրամասները, որի ընթացքում ռուս զինվորականները կարողացել են օգտագործել ոչ ֆունկցիոնալ գազատար խողովակը՝ գաղտնի անցման համար Ուկրաինայի զինված ուժերի թիկունք: Նրա խոսքով՝ ամբողջ գազը խողովակից դուրս է մղվել և դրա տեղ թթվածին է մտցվել։

Ռուսական 800 զինյալներից բաղկացած ջոկատը մոտ 15 կիլոմետր է անցել Ուրենգոյ-Պոմարի-Ուժգորոդ դատարկ գազատարով, որպեսզի ներթափանցի ուկրաինական թիկունք: Օպերացիան տեւել է մոտ մեկ շաբաթ։ Սայլերն օգտագործվում էին խողովակի ներսում ջուր և անհրաժեշտ ամեն ինչ մատակարարելու համար։