«Պետք է խմբեր կազմվեն, որոնք բանակցությունների մեջ կմտնեն իշխանությունների հետ քաղաքական եւ իրավական հարցերով»

Արցախցիների իրավունքների պաշտպանության խորհուրդն այսօր Ազատության հրապարակում քննարկում անցրկացրեց ՀՅԴ ներկայացուցիչների հետ։ ՀՅԴ Արցախի կենտրոնական կոմիտեի ներկայացուցիչ Արա Պուլուզյանը քննարկումից հետո լրագրողներին ասաց․ «Սոցիալական հարցերից զատ, նաեւ կարեւորեցինք քաղաքական եւ իրավական հարցերը։ Մեր տեսակետն այն է, որ պետք է խմբեր կազմվեն, որոնք բանակցությունների մեջ կմտնեն իշխանությունների հետ քաղաքական եւ իրավական հարցերով»։

Իրավական հարցերից ամենակարեւորը, որոնց բախվում են արցախցիները Հայաստանում, նրա խոսքով, քաղաքացիության հարցն է։

Պուլուզյանը նաեւ ասաց, որ Հայաստանի արտաքին քաղաքականության մեջ գերակա պետք է լինեն գերիների վերադարձի եւ արցախցիների վերադարձի հարցերը։ Այնինչ, ՀՀ իշխանությունները ժխտոմ են այդ հարցերը։ «Ես դա դասալքություն եմ համարում։ Դաշնակցության Հայ դատի գրասենյակներն այդ ուղղությամբ բավական ակտիվ աշխատանք են տանում, եւ մոտ օրերին դուք նաեւ բացահայտ կտեսնեք այդ աշխատանքի արդյունքները։ Հուսով ենք, որ կկարողանանք նաեւ Հայաստանի իշխանությունների վրա ինչ-որ ճնշումներ գործադրել, որ նաեւ Հայաստանի արտաքին քաղաքականության մեջ այդ հարցերը տեղ գրավեն։ Ինչքան շատ միջազգհային հարթակներում բարձրացվեն արցախցիների, Արցախի ու գերիների հարցերը, այնքան Հայաստանի դիրքերը կամրանեն, եւ ՀՀ իշխանությունը կկարողանա խուսափել այլ զիջումներից ու պարտադրանքներից։ Ընդհանրապես բանակցությունների մեջ պետք է ունենաս քո պահանջների օրակարգը, երբ չունես քո պահանջների օրակարգը կամ անընդհատ միայն ենթարկվելու դիրքում ես, քո դիրքերն օրենցօր թուլանում են, եւ օրեցօր նվազում են քո դիվանագիտական կարողությունները»,- հավելեց Պուլուզյանը։