Միրզոյան․ Մինսկի խմբը կարող է հակառակ ազդեցություն ունենալ կարգավորված հակամարտության վրա

«Ինչպես եւ նախկինում, մենք կարծում ենք, որ դե ֆակտո ավարտված հակամարտությունը դե յուրե ավարտելու դեպքում, որի մարմնավորումը կարող է լինել խաղաղության համաձայնագրի ստորագրումը, մենք կարիք չենք ունենա մի միջազգային ֆորմատի, որը կոչված է զբաղվել այդ հակամրտությամբ։ Հետեւաբար, Մինսկի խմբի գոյությունը ոչ մի հավելյալ արժեք չի տա, հակառակը կարող է հակառակ ազդեցություն ունենալ կարգավորված հակամարտության վրա։ Այդ պատճառով մենք կողմ ենք այդ ձեւաչափի լուծարմանը, եւ մենք այդ փաստաթղթերը կարող ենք նույն օրը ստորագրել, մեկ ժամ առաջ կամ հետո, համատեղ դիմելով ԵԱՀԿ-ին եւ տեղեկացնելով այդ խմբի լուծարման գործընթաց սկսելու Հայաստանի եւ Ադրբեջանի պատրաստակամության մասին»,- այսօր Սլովենիայի փոխվարչապետ, արտաքին ու եվրոպական հարցերի նախարար Տանյա Ֆայոնի հետ համատեղ ասուլիսում ասաց ՀՀ ԱԳ նախարար Արարատ Միրզոյանը՝ անդրադռանալով Բաքվի պահանջներին։

Բաքվի մյուս պահաջը՝ Հայաստանի եւ Արցախի վերամիավորման որոշմանը կատարված հղումը ՀՀ Սահմանադրությունից հանելն է։ Նիկոլ Փաշինյանն արդեն ասել է, որ իր կարծիքով՝ նոր Սահմանադրության տեքստում չպետք է հղում լինի Անկախության հռչակագրին։

Անդրադառնալով այս պահանջին՝ Արարատ Միրոզոյանն ասաց, որ պետք է հասկանալ, թե որքանով են անկեղծ Ադրբեջանի մտահոգությունները։ Ըստ նրա՝ եթե սա անուղղակի գործիք ու խոսույթ է, որն օգտագործվում է Ադրբեջանի կողմից բանակցությունները ձգձգելու եւ «խաղաղության» փաստաթուղթ չստորագրելու հաար, սա մի իրավիճակ է։ Իսկ եթե ադրբեջանցիներն անկեղծորեն մտահոգություն են տեսնում այդ հարցում, դա այլ իրավիճակ է։ «Եվ այստեղ մենք կարող ենք բացատրություն տալ, խոսել հարցի մասին, որ մեր Սահմանադրությունը չի պարունակում որեւէ տարածքային պահանջ Ադրբեջանի տարածքային ամբողջականության նկատմամբ»,- նշեց նա՝ հղումանելով ՍԴ՝ ավելի վաղ ընդունած որոշմանը։