Խամենեին մերժում է Թրամփի «անվերապահ հանձնման» կոչը. հաջորդ քայլերը անորոշ են
- 22:39 18.06.2025
ԱՄՆ նախագահ Դոնալդ Թրամփը Սպիտակ տան դիմաց լրագրողների հետ զրույցում շրջանցեց Իրանի դեմ պատերազմին ԱՄՆ-ի հնարավոր մասնակցության վերաբերյալ հարցերը։
«Ես դա չեմ կարող ասել», – ասաց նա։ «Ես կարող եմ դա անել, կարող եմ՝ ոչ։ Ոչ ոք չգիտի, թե ես ինչ եմ ուզում անել։ Բայց ես կարող եմ ասել հետևյալը. Իրանը շատ խնդիրներ ունի, և նրանք ուզում են բանակցել», – ավելացրեց Թրամփը։
Նա կրկին ասաց, որ Իրանը պետք է ավելի պատրաստակամ լիներ բանակցելու Իսրայելի կողմից հարվածների սկսվելուց հետո։
Թրամփն ասաց, որ Իրանի բանակցողները ենթադրել են, որ նրանք «կարող են գալ Սպիտակ տուն»։ Սակայն նա ասաց, որ դա դժվար կլինի անել։
Իրանը դիմել է, բայց Թրամփն ասաց, որ արդեն շատ ուշ է։
«Երկու շատ պարզ բառ՝ անվերապահ հանձնում», – ասաց ԱՄՆ նախագահը։ «Ես բավականաչափ դիմացա»։
Ռոյթերսի տվյալներով՝ Թրամփը նաև Իրանին անվանել է լիովին անպաշտպան երկիր, որը չունի օդային պաշտպանություն։
ԱՄՆ նախագահի կողմից Իրանի «անվերապահ հանձնման» կոչից հետո, Գերագույն առաջնորդ այաթոլլահ Ալի Խամենեին սպառնալիքներ է հնչեցրել Վաշինգտոնի հասցեին։ «Իրանի դեմ ցանկացած ռազմական միջամտություն, անկասկած, անդառնալի վնաս կպատճառի», – ասել է նա չորեքշաբթի՝ հունիսի 18-ին, հեռուստատեսային ելույթում։
Խամենեին մերժել է Թրամփի պահանջը և ընդգծել, որ իրանցի ժողովրդի հետ «չի կարելի խոսել սպառնալիքների լեզվով», մինչդեռ իրանցիները «վճռական են և կդիմադրեն պարտադրված պատերազմին այնպես, ինչպես կդիմադրեին պարտադրված խաղաղությանը»։ Ինչպես նշում է dpa-ն, Իրանի պետական հեռուստաալիքները, որոնք հեռարձակել են Խամենեիի ելույթը, նրան չեն ցուցադրել, և նրա ձայնը չի լսվել։
Իրանի արտաքին գործերի նախարարությունը նաև զգուշացրել է օտարերկրյա պետություններին չմիջամտել Իսրայելի հետ ռազմական հակամարտությանը: Երրորդ երկրի ուղղակի ռազմական միջամտությունը կարող է հանգեցնել «լայնածավալ պատերազմի, որը կընդգրկի ամբողջ տարածաշրջանը և նույնիսկ կգնա դրանից այն կողմ», – «Ալ Ջազիրա»-ին ասել է Իրանի արտաքին գործերի նախարարության խոսնակ Իսմայիլ Բաղային: Նա հնարավոր է համարել Միացյալ Նահանգների հետ բանակցությունների հնարավորությունը, միաժամանակ հայտարարելով ամերիկյան վարչակազմի նկատմամբ վստահության լիակատար կորստի մասին: