Կկրճատվի անապահով խմբերին աջակցությունը, և գումարը կտրամադրվի ապահովագրությանը
- 21:18 11.11.2026
Հայաստանի կառավարությունը 29.3 միլիարդ դրամ՝ ավելի քան 80 միլիոն դոլար կուղղի Առողջապահական համընդհանուր ապահովագրության հիմնադրամին՝ քաղաքացիների ապահովագրության սուբսիդավորման համար։ Այդ գումարը կներառի մինչև դեկտեմբեր ապահովագրավճարների սուբսիդավորման պարտքը։ Այդ մասին հայտնում է Ազատությունը։
Համապատասխան որոշման նախագիծը ներառված է Կառավարության վաղվա նիստի օրակարգում։ Կառավարությունը սուբսիդավորման այս պարտքը հիմնադրամին մտադիր է հատկացնել՝ նվազեցումներ կատարելով Ֆինանսների նախարարությունից ու Աշխատանքի և բարեկեցության նախարարությունից։ Մասնավորապես, Ֆինանսների նախարարության պետական պարտքի սպասարկման գումարներից ապահովագրության սուբսիդավորմանը կուղղվի 10 մլրդ դրամ։
Ավելի քան 19 մլրդ դրամ էլ կվերաբաշխվի Աշխատանքի և բարեկեցության նախարարության միջոցներից, մասնավորապես կրճատումներ կլինեն անապահով և կյանքի դժվարին իրավիճակում սոցիալական խմբերին աջակցության, ընտանիքի կենսամակարդակի բարձրացմանն ուղղված, զբաղվածության, անհուսալի վարկային պատմություն ունեցող անձանց աջակցության ծրագրերից և կուղղվեն ապահովագրությանը։