Ճանկաթաղն այսօր․ կրակում են ժամանակ առ ժամանակ, հունիսի վերջին օրերին առավել ակտիվ
- 20:15 30.06.2023
Վերջին օրերին ադրբեջանական կողմը սկսել է ավելի ինտենսիվ կերպով խախտել հրադադարի ռեժիմը խաղաղ բնակչության ուղղությամբ։ Մարտակերտի շրջանի Ճանկաթաղն այն սահմանամերձ գյուղերից է, որը օրերս գնդակոծվել է ադրբեջանական դիրքերից, ինչի հետեւանքով տուժել են բնակելի շենքեր։
Համայնքը գտնվում է գյուղի մետի բարձունքների մի քանի մարտական դիրքերի անմիջական տեսադաշտում։
«Պարբերաբար կրակում են։ Հատկապես հաճախակի են եղել կրակոցները հունիսի վերջին օրերին։ Չեմ կարող ասել, որ չենք վախենում, ինչպես բոլոր նորմալ մարդիկ, մենք, իհարկե, վախենում ենք երեխաների համար։ Բայց միևնույն ժամանակ չենք ուզում լքել գյուղը։ Շարունակում ենք ապրել, աշխատել, սովորել։ Շրջափակման պատճառով շատ խնդիրներ ունենք, բայց մեզ համար առաջին տեղում անվտանգության խնդիրն է, ու միակ ցանկությունն է, որ այս խնդիրը լուծվի»,- ասաց գյուղի ակումբի վարիչ Նատալյա Շաքարյանը։
Նա ասաց, որ Ղարաբաղյան առաջին պատերազմի ժամանակ Ճանկաթաղ գյուղն ամբողջությամբ ավերվել է։ Նրա ամուսինը զոհվել է, և նա ստիպված է եղել խնամել երեխաներին և վերակառուցել տունը միայնակ։ Նատալիայի խոսքով՝ ինքը երբեք չի պատկերացրել, որ գյուղը կարող է նման իրավիճակում հայտնվել՝ շրջապատված լինել թշնամու կողմից։ Հիմա սարսափելի է թոռներին բակ թողնելը:
Շաքարյանն ասաց, որ գյուղում կա եկեղեցի, դպրոց, ակումբ, վարչական շենք, բուժկետ, մանրածախ առևտրի կետեր։ Շրջափակման պատճառով խնդիրներ կան սննդի, վառելիքի, դեղորայքի հետ կապված։
Գյուղում ապրում է մոտ 400 մարդ։ Նրանք հիմնականում զբաղվում են գյուղատնտեսությամբ՝ անասնապահությամբ և հողագործությամբ, աշխատողներ կան նաև Մարտակերտի շրջանի հանքերում։